Краток тест: Nissan Qashqai

Со пионерско деби во сегментот на C-SUV кросоверите, Nissan Qashqai за прв пат се појави на пазарот во 2007 година. Првата генерација на популарниот јапонски модел, за време на своето производство достигна продажба од околу 2 милиони примероци, што претставуваше навистина голем предизвик за идната генерација.

Во 2014 година, во малку поголемо пакување, Nissan го претстави новиот и комплетно ревидиран Qashqai, давајќи му елегантен став, истовремено одржувајќи го стилот на класичен кросовер, со компактни димензии и подигната позиција за возење.

Четири години подоцна, втората генерација на јапонскиот SUV доби и фејслифт третман, кој покрај измените во дизајнот, се карактеризира и со измени во палетата на погонските агрегати, како и со надополнувања на технолошкиот спектар. Овие значајни подобрувања се очекува да ја поткрепат и зајакнат неговата позицијата на врвот на листата на најпосакувани кросовери во Европа.

Премиум динамичен стил

Најзабележителните подобрувања на Qashqai се во неговата надворешност. Одликувајќи се со современиот нов изглед – стилот што Nissan го нарекува премиум динамика, надградбите се видливи од секој агол. Предниот дел е целосно ревидиран, со нов преден браник, “Nissan V-motion” решетка и нова форма на светлата за магла.

Предните фарови се карактеризираат со LED дневни светла, со уникатен светлосен потпис во форма на „бумеранг“, кои се состојат од девет LED диоди, наместо шест. На задната страна, се забележува целосно нов браник, кој придонесува кон посовремен и помодерен облик на Qashqai. Светлосниот потпис е проширен и тука, во задните светлосни уреди, кои добиваат и 3D аеродинамичен елемент.

1 |  

2 |  

 3 |  

Квалитет и високо ниво на удобност

Влијанието на надградбите на Nissan Qashqai се забележува и во кабината. Тие резултираат со највисоки нивоа на квалитет и префинетост, повеќе ориентиран кон возачот и зголемено чувство на целосна контрола. Она што нѐ пречекува уште при самото оторање на возачката врата е панорамскиот стаклен кров и целосно новиот управувач, кој го одразува тековниот дизајнерски јазик на брендот.

Подобрувања се направени и во насока на инфозабавните системи, каде дигиталното радио DAB е сега стандардно, додека пак NissanConnect добива нов кориснички интерфејс со поприлагоден изглед. Додавањето на BOSE Premium звучниот систем значи зголемување на опсегот на аудио единици во автомобилот, со што се постигнуваат подобри перформанси со зголемена тонска рамнотежа.

1 | 

2 | 

3 |  

4 |  

Ревидиран погонски спектар

Со сигурност може да се каже дека најдраматичните измени се во просторот под моторниот капак. На листата на бензинските агрегати, досегашните 1,2 и 1,6 литарски мотори се сега целосно заменети со новиот 1,3 литарскиот турбо мотор, кој е развиен во соработка со алијансата Renault-Nissan-Mitsubishi и Daimler и ги задоволува WLTP барањата.

Дизајниран да овозможи намалена горивна потрошувачка и помали CO2 емисии, новиот DIG-T мотор дебитира во моделот на Nissan, а до сега имавме прилика да го видиме под капакот на Renault Kadjar. Со филтер за цврсти честички, интегриран издувен систем, глава со „делта“ цилиндар, вбризгалки со шест влеза и притисок од 250 бари, e-wastegate турбо полнач и компресија до 10,5:1, во Qashqai тој е достапен со две нивоа на моќност.

Со 140 или 160 коњски сили, јапонскиот SUV доаѓа во комбинација со шест-степен рачен или DCT менувач. Како одлична замена за CVT, DCT, односно преносот со двојна спојка за прв пат во моделите на Nissan, дебитира во Qashqai, а има значителен придонес кон непреченото распоредување на моќноста.

Во поглед на перформансите, послабата верзија на новиот 1,3 литарски мотор е за 25 коњски сили помоќна од претходниот 1,2 литарски мотор, со намалување на потрошувачката и емисијата на CO2.

Помоќниот пак, односно 160 коњскиот модел е за 3 коњски сили послаб од минатиот 1,6 литарски, но сепак со 20 Nm поголем вртежен момент (260Nm). И кај него постигната е помала горивна потрошувачка и тоа за 0,3 литри на 100 изминати километри.

1 |

2 |

3 |

Тестираниот модел беше во изведба со 160 коњски сили и шест-степен рачен менувач, со N-Connecta пакетот на опременост. Она што може да кажеме за вака конфигураниот агрегат е дека рамномерното и линеарното распределување на моќноста навистна доаѓаат до израз, каде високо ниво на бучавост изостанува. Сето ова е постигнато со декларираната просечна потрошувачка од 5,3 литри, односно во реални градски услови Qashqai троши нешто над 7,2 литри на секои 100 изминати километри.

Новиот Qashqai исто така обезбедува прецизно ракување и управување, со навистина брз одзив, како во урбаната средина, така и на отворен пат. Новите интелигентни технологии за помош при возењето, значително го олеснуваат управувањето и го зголемуваат нивото на безбедност, а најзаслужни за ова се системот за сопирање во непредвидени ситуации и системот за предупредување при ненамерно напуштање на сообраќајна лента.

Паркирањето и возењето наназад е олеснето со помош на Around View Monitor, кој се состои од 4 камери кои овозможуваат целосен панорамски преглед на околината, со што се олеснуа возењето наназад и паркирањето.

Атрактивниот Nissan Qashqai сега е дел од промотивна кампања на Аутомотив Груп, а за повеќе информации кликнете овде.

Технички податоци за Nissan Qashqai 1.3 DIG-T 160 Acenta

Nissan Qashqai во Македонија

Повеќе информации во салонот на Аутомотив Груп или на https://www.nissan.mk/.