Kia го претстави новиот K4 кој пристигнува во Европа
Новата Kia K4 доаѓа со спортски изглед, 438 литри багажник и неколку пгоонски опции, а продажбата започнува до крајот на 2025 година
Kia го претстави новиот K4, наследникот на Ceed, кој ќе се појави на европскиот пазар до крајот на 2025 година. Моделот ја претставува најновата интерпретација на филозофијата за дизајн ‘Opposites United’, комбинирајќи спортски пропорции, изразен изглед и високотехнолошка внатрешност.
Со должина од 4.440 мм и ширина од 1.850 мм, K4 нуди динамични линии и препознатлива „лебдечка“ кровна линија која завршува со стилски хечбек заден дел. Во GT-Line изведбата, автомобилот добива уште поагресивен карактер со 17 или 18-инчни алуминиумски фелни, црни ретровизори и спортски детали на каросеријата.
Простор и практичност
Еден од најсилните адути на Kia K4 е неговата пространост. Благодарение на меѓуоскино растојание од 2.720 мм, патниците на задната клупа добиваат голем простор за нозете (964 мм) и многу простор за глава (973 мм). Багажникот располага со 438 литри капацитет, што го прави автомобилот практичен и за семејни патувања и за секојдневни обврски.
Понуда на погони
Моделот ќе биде достапен со пет различни погонски единици, од кои две се електрифицирани. Основната верзија користи 1.0 T-GDI мотор со 115 КС и шест-степен мануелен менувач, а достапна е и MHEV верзија со седум-степен DCT менувач. Понатаму следуваат две изведби на 1.6-литарски турбо бензинец со 150 КС или 180 КС, кои доаѓаат исклучиво со DCT. Во 2026 година се очекува и полнохибридна верзија, што ќе овозможи уште поголема ефикасност.
Внатрешност и технологија
Кабината на K4 е модерна и технолошки напредна, со панорамски дисплеј кој комбинира 12.3-инчен дигитален инст
румент панел, 5.3-инчен екран за клима и 12.3-инчен инфозабавен екран. Системот ccNC (Connected Car Navigation Cockpit) обединува навигација, мултимедија и поставки на возилото во еден интуитивен интерфејс.
Стандардна опрема се Wireless Apple CarPlay и Android Auto, а во повисоките нивоа на опрема има Harman Kardon аудио систем, греани и вентилирани седишта, безжичен полнач и Digital Key 2.0 кој овозможува отклучување и стартување преку паметен телефон.
Позиционирање и продажба
Продажбата на Kia K4 во Европа ќе започне до крајот на годината, а цените се очекува да бидат конкурентни во однос на останатите хечбек модели во сегментот. Со својата комбинација на модерен дизајн, водечки простор во класата и богата опрема, K4 има потенцијал да стане еден од најпосакуваните компактни модели на пазарот.
