Најлуксузниот кинески бренд доаѓа во Европа со 15 модели

Hongqi, најстариот кинески бренд за патнички автомобили, е основан во 1958 година како дел од државната компанија FAW Group, која патем е една од четирите најголеми автомобилски производители во земјата. Овој бренд претставува симбол на луксуз и премиум мобилност во Кина кој сега има стратегија за ширење и надвор од границите. Досега Hongqi како бренд беше поврзан и резервиран за високите владини функционери и државните церемонии и неговите возила ги користи кинеската влада, поради што брендот со децении беше поврзуван со луксуз и статус и важи за своевиден кинески Rolls-Royce. Со најновата стратегија, Hongqi ја менува својата улога, трансформирајќи се во глобален играч со цел да го освои европскиот пазар со палета на модерни електрични и хибридни модели.

За таа цел, Hongqi, во сенка на главните случувања, го претстави својот нов електричен SUV EHS5 на автомобилскиот саем во Минхен 2025, означувајќи важен чекор во својата европска експанзија. Компанијата, чие име во слободен превод значи „црвено знаме“, има амбициозна цел – да отвори повеќе од 200 продажни салони низ Европа до 2028 година и да лансира најмалку 15 нови електрични и хибридни модели.

Дизајн и технологии

Новиот Hongqi EHS5 е средноголем SUV кој ја спојува современата кинеска естетика со европскиот вкус. Додека предниот дел е прилично конзервативен и потсетува на модели од други кинески брендови, задниот дел се издвојува со елегантни LED светлосни групи со изразен дизајн. Моделот користи батерија од 85 kWh која нуди WLTP-деклариран досег од 550 километри, а полнењето од 10 до 80 проценти трае само 20 минути.

Кога станува збор за самиот дизајн, забележливо е дека EHS5 има далеку помејнстрим дизајн од она на што Hongqi е навикнат, со оглед на тоа дека е познат по луксузниот дизајн кој наликува на Maybach и Rolls-Royce.

Моќност и перформанси

Иако точните спецификации за европскиот пазар сè уште не се откриени, во Кина EHS5 се нуди во верзии со 339 КС и погон на задните тркала, како и во 610 КС конфигурација со погон на сите тркала и батерија од 111 kWh. Се очекува европскиот модел да има нешто поумерени перформанси, но сепак доволни да конкурира на ривалите од сегментот.

Европски планови

Hongqi веќе е присутен на неколку европски пазари, вклучувајќи ги Норвешка, Холандија и Полска. Планот е агресивна експанзија во наредните три години, со проширување на мрежата на дилери и лансирање на нови модели кои треба да го зацврстат имиџот на брендот како премиум играч во електричниот сегмент.

Со EHS5, Hongqi испраќа јасна порака – европскиот пазар станува една од неговите главни приоритети, а конкуренцијата меѓу кинеските електрични SUV модели само што стана уште поинтересна.