Volkswagen претстави електричен велосипед со радар, камера и паметни очила

Volkswagen го проширува своето присуство во светот на електричната мобилност со нова генерација електрични велосипеди опремени со технологии кои досега беа резервирани за модерните автомобили. Развиен во соработка со премиум производителот на е-велосипеди n+, новиот модел добива радар, задна камера, паметен шлем и AR очила, со цел значително да ја подобри безбедноста на велосипедистите во градски услови.

Автомобилска технологија пренесена на велосипед

Наместо да се фокусира исклучиво на поголема батерија или помоќен електромотор, Volkswagen акцентот го става на активната безбедност. Новиот електричен велосипед користи технологии инспирирани од автомобилската индустрија, кои им помагаат на велосипедистите подобро да ја следат околината и воедно да бидат повидливи за останатите учесници во сообраќајот.

Во густите урбани средини, каде велосипедите и автомобилите секојдневно го делат истиот простор, ваквите системи можат значително да го намалат ризикот од несреќи.

Smart View: Радар и камера наместо вртење на главата

Главната новина е системот Smart View, кој комбинира задна камера и радар за следење на возилата што се приближуваат од задниот дел.

Сликата од камерата се прикажува на дисплеј интегриран во управувачот, овозможувајќи му на велосипедистот да види што се случува зад него без да ја тргне погледот од патот. Истовремено, радарот испраќа предупредување доколку возило се приближува со поголема брзина.

Ова е технологија која веќе се користи кај современите автомобили за следење на мртвиот агол и предупредување за опасност, а сега првпат добива примена и кај електричен велосипед.

LED осветлување што комуницира со другите учесници во сообраќајот

Volkswagen го опремува велосипедот и со интелигентен LED светлосен систем интегриран во рамката.

Во текот на денот светлата функционираат како дневни светла, додека при сопирање автоматски светат во црвена боја. При вртење, системот активира жолти трепкачи кои јасно ја покажуваат насоката на движење, овозможувајќи им на останатите учесници во сообраќајот навреме да ги забележат намерите на велосипедистот.

Поврзан паметен шлем со детекција на незгода

Безбедносниот пакет не завршува со самиот велосипед. Volkswagen нуди и поврзан паметен шлем кој комуницира со светлосниот систем на велосипедот и располага со сопствено LED осветлување.

Шлемот е опремен и со систем за автоматска детекција на судир. Во случај на несреќа, тој може автоматски да испрати известување до претходно избрани контакти за итни случаи.

Паметни очила со навигација и сообраќајни предупредувања

Дел од екосистемот се и паметните очила со проширена реалност (Augmented Reality). Благодарение на поврзаноста со камерата и радарот, тие директно во видното поле на велосипедистот прикажуваат навигација, предупредувања за сообраќајот и информации за возењето.

Интересно е што технологијата е развиена од инженери кои претходно работеле на дисплеи за кациги на воени пилоти, па принципот на функционирање е сличен на оној што се користи во модерните борбени авиони.

Безбедноста добива приоритет

Иако дел од традиционалните велосипедисти можеби нема да бидат воодушевени од толку дигитализирано искуство, Volkswagen смета дека ваквите системи можат значително да ја зголемат безбедноста на патиштата. Со комбинирањето на радар, камери, интелигентно осветлување и поврзана заштитна опрема, германскиот производител покажува како технологиите од автомобилската индустрија постепено се префрлаат и во светот на електричните велосипеди.