Peugeot RCZ Vision: Електрично купе со 500 КС и полнење за само 10 минути

Peugeot на Саемот за автомобили во Париз го претстави RCZ Vision, концепт кој го враќа името на спортското купе RCZ, но во целосно ново електрично издание. Новиот модел не е само дизајнерска вежба, туку и јасна најава за технологиите и стилските решенија што францускиот производител ќе ги користи во своите идни сериски модели.

RCZ Vision пристигнува во време кога Stellantis најавува дека Peugeot ќе биде една од четирите марки кои ќе добијат најголем дел од идните инвестиции на групацијата, заедно со Jeep, Ram и Fiat.

Нова дизајнерска филозофија „Feline Future“

Концептот го оживува името на купето кое се произведуваше од 2009 до 2015 година како конкурент на Audi TT, но со целосно нов изглед. RCZ Vision е ниско и широко купе со препознатлив стаклен покрив со двојна испакнатина, додека каросеријата носи нов дизајнерски јазик наречен „Feline Future“.

Предниот и задниот дел добиваат нова хоризонтална интерпретација на светлосниот потпис со трите „канџи“ на Peugeot, а на предниот браник е втиснат микроперфориран натпис RCZ. Изразените странични линии и широките раменици дополнително го нагласуваат спортскиот карактер, додека ниската силуета е овозможена благодарение на исклучително тенката батерија со висина од само 110 милиметри.

Футуристички ентериер со Hypersquare управувач

Во кабината доминира новиот Hypersquare управувач, кој веќе беше претставен на претходни концепти, а ќе се појави и во серискиот Peugeot E-208.

Благодарение на steer-by-wire технологијата, управувањето бара помалку од едно целосно вртење од крајна лева до крајна десна положба при мали брзини, додека при повисоки брзини односот автоматски се менува за поголема стабилност.

Peugeot го модернизира и својот i-Cockpit, каде најважните информации остануваат поставени над управувачот, додека возачот може да ги прилагодува останатите податоци преку микро LED дисплеи. Централниот екран, доколку возачот посака, може целосно да се исклучи.

500 КС, автономија до 600 километри и полнење за 10 минути

Под атрактивната каросерија се крие новата STLA One платформа на Stellantis, која ќе дебитира во сериските модели во текот на 2027 година. Иако архитектурата поддржува и хибридни погони, RCZ Vision е претставен како целосно електричен модел.

Концептот располага со електромотор кој развива 500 КС, додека најголемата технолошка новина е 1.000-волтната електрична архитектура комбинирана со цврстотелна (solid-state) батерија.

Peugeot наведува дека батеријата може да се наполни од 10 до 80 проценти за само 10 минути, а автономијата достигнува 600 километри според WLTP циклусот. Просечната потрошувачка изнесува само 11,5 kWh на 100 километри, што го прави концептот еден од најефикасните електрични спортски автомобили претставени досега.

Сериски RCZ сè уште не е потврден

Иако RCZ Vision изгледа подготвен за производство, Peugeot засега не потврдува дека ќе добие сериска верзија. Купе моделите денес претставуваат релативно мал пазарен сегмент, па компанијата останува претпазлива.

Сепак, голем дел од технологијата прикажана на концептот сигурно ќе се најде во идните модели на Peugeot и останатите брендови на Stellantis. Новата STLA One платформа, 1.000-волтната електрична архитектура, steer-by-wire системот, системот за автономно возење L2++, како и новите дизајнерски елементи, ќе станат дел од следната генерација сериски автомобили на групацијата.