Поранешниот шеф на Porsche е нов извршен директор на Škoda
Чешкиот производител Škoda се подготвува за ново поглавје во својата историја кое ќе започне со нов извршен директор
Škoda врти нов лист во својата историја, а новото поглавје ќе започне од јули оваа година кога чешкиот производител од Млада Болеслав ќе добие нов извршен директор. Почнувајќи од 1 јули, Клаус Целмер ќе го замени Томас Шафер на чело на брендот. Целмер ќе биде назначен како нов член на менаџерскиот борд на Škoda, по што ќе биде избран од страна на истиот за нивни нов претседател.
Целмер ја започна својата кариера во автомобилската индустрија во 1997 година како асистент во Porsche. Само две години подоцна се пресели во Франција за да работи во продажниот оддел на германската компанија. По голем број различни позиции во редовите на славниот производител, тој стана шеф на маркетинг во Германија и беше промовиран на позицијата претседател на управниот одбор во 2010 година. Тој е член на управниот одбор на Volkswagen групацијата задолжен за продажба, маркетинг и постпродажба од септември 2020.
Актуелниот извршен директор на Škoda, Томас Шафер, ќе биде промовиран како нов претседател на управниот одбор на Volkswagen. Тој исто така беше задолжен за оперативниот бизнис на VW брендот од 1 април годинава. Тој исто така ќе стане и бренд претседател на Volkswagen групацијата.
„Томас Шафер ја предводеше компанијата безбедно низ две екстремно тешки години и истовремено формулираше јасен план за иднината со Next Level – Škoda Strategy 2030. Денес, Škoda e поелектрична, подигитална и поинтернационална од било кога. Томас Шафер ги постави темелите за ветувачка иднина за брендот Škoda со успешното лансирање на електричниот Enyaq iV и останатите планирани е-модели“, изјави Мурат Аксел, претседател на Škoda.
