Citroen го надгради C5 Aircross со нова хибридна опција
Францускиот кросовер Citroen C5 Aircross го добива новиот благо електрифициран трицилиндричен бензински мотор на Stellantis
Stellantis постепено ја електрифицира својата флота со додавање на новиот турбо 1,2-литарски PureTech 48V благ хибриден погон. Откако го лансираше во Peugeot 3008 и 5008 претходно оваа година, истиот погонски склоп се најде под хаубата на механички поврзаниот Citroen C5 Aircross, додавајќи поголема ефикасност.
Citroen C5 Aircross веќе беше достапен со plug-in хибридни погонски агрегати (Hybrid 180 и Hybrid 225), но ова е првпат да добие благ хибриден систем, кој се наоѓа под нив во однос на моќноста и цената.
1,2-литарскиот трицилиндричен бензинец со турбополнач е поврзан со нов електрифициран 6-степен автоматски менувач со двојна спојка (e-DCS6), испраќајќи ја силата на предните тркала. Малиот синхрон електричен мотор со постојан магнет произведува 29 КС и е интегриран во куќиштето на менувачот заедно со инверторот и ECU.
Моќноста на погонската единица е 136 КС и 230 Nm вртежен момент, но електричниот мотор може да придонесе дополнителни 12 КС при силно забрзување. Енергијата се добива од 48V литиум-јонска батерија со капацитет од 432 Wh што е поставена под возачкото седиште.
Поголема ефикасност
Според Citroen, вкупната заштеда во просечната потрошувачка на гориво во споредба со неелектрифицираниот еквивалент е 1 л/100 км, што претставува подобрување од 15% што може да достигне и до 30% во градот. Всушност, Citroen сугерира дека и покрај благата електрификација, дури 50% од урбаното возење може да се направи со нула емисија на штетни гасови. Просечните емисии на CO2 во комбинираниот циклус WLTP се 129 g/km додека моделот е компатибилен со стандардот Euro 6.4.
Citroen не промени ништо на надворешноста на C5 Aircross, кој првично беше претставен во Европа во 2018 година, со фејслифтинг кој следуваше во 2022 година. Тахометарот станува син кога ќе се исклучи моторот со согорување, има нов мерач на енергија со ознаки Charge, Eco и Power, додека специјалните графики го прикажуваат протокот на енергија и процентот на завршено возење во ЕВ режим.
Citroen C5 Aircross Hybrid 136 e-DCS6 ќе биде достапен за нарачка наскоро, а првите испораки ќе започнат во втората половина на 2023 година. Кросоверот со благ хибриден погон ќе се нуди во Feel, Feel Pack, Shine и Shine Pack како и со другите погонски опции во неговата постава.
