Denza Z е кинески електричен суперавтомобил со 1.582 КС

Премиум брендот Denza, кој е во сопственост на BYD, официјално го претстави новиот електричен суперавтомобил Z на Фестивалот на брзината во Гудвуд. Новиот модел привлекува внимание со импресивни перформанси, моќност од 1.582 коњски сили. Покрај купе верзијата, Denza потврди дека моделот ќе биде достапен и како Spider и Racing, додека во подготовка е и екстремната Special Edition изведба со повеќе од 2.000 коњски сили.

Три електромотори и забрзување под две секунди

Сите верзии на Denza Z се поставени на новата e3 Sports Car платформа и користат три електромотори – еден на предната и два на задната оска. Комбинираната моќност изнесува 1.582 коњски сили и 1.240 Nm максимален вртежен момент.

Основната Coupe верзија забрзува од 0 до 100 km/h за само 2,25 секунди, додека Racing изведбата го намалува тоа време на неверојатни 1,96 секунди со полуслик гуми. Максималната брзина кај Racing достигнува 350 km/h, додека останатите верзии се ограничени на 300 km/h.

Special Edition ќе располага со повеќе од 2.000 коњски сили

Denza веќе најави уште помоќна верзија наречена Z Special Edition. Овој модел ќе развива повеќе од 2.000 коњски сили, ќе забрзува до 100 km/h за помалку од 1,7 секунди и е развиен со цел напад на рекордот за најбрз електричен автомобил на патеката Нирбургринг.

Повеќе технички детали за оваа изведба ќе бидат објавени во периодот кога ќе започнат официјалните тестирања на легендарната германска патека.

Батеријата се полни до 97 проценти за само девет минути

Секој Denza Z користи Blade Battery од втора генерација со капацитет од 76 kWh. Благодарение на новата FLASH Charging технологија на BYD и полначите со моќност до 1.500 kW, батеријата може да се наполни од 10 до 70 проценти за само пет минути, односно до 97 проценти за девет минути.

Автономијата зависи од верзијата. Основниот Coupe може да помине до 409 километри според WLTP циклусот, Spider нуди до 399 километри, додека Racing располага со автономија до 380 километри.

Иако изгледа како класичен суперавтомобил, Denza Z располага со четири седишта благодарение на меѓуоскиното растојание од 2.780 милиметри. Шасијата користи магнетореолошка суспензија, карбон-керамички сопирачки, torque vectoring систем и функција Compass Turn, која му овозможува на автомобилот да ротира околу предната оска при маневрирање.

Луксузна кабина со масажа и Google инфозабавен систем

Во ентериерот Denza Z нуди опрема која е типична за најлуксузните електрични автомобили. Стандардно се вградуваат седишта со масажа, Devialet аудио систем, амбиентално осветлување, дигитален ретровизор и 12,8-инчен инфозабавен систем со интегрирани Google услуги.

Возачот може да избира и виртуелен звук на моторот, како и специјални режими Boost и Track за максимални перформанси.

Конкуренција на европските премиум брендови

Во Велика Британија купе верзијата на Denza Z започнува од 142.900 фунти. Spider моделот чини 159.900 фунти, додека Racing изведбата има почетна цена од 172.900 фунти.

Со комбинацијата од екстремни перформанси, брзо полнење, богата опрема и конкурентна цена, Denza Z претставува еден од најамбициозните електрични суперавтомобили што досега пристигнале од Кина и директен предизвик за европските премиум производители.