Formula 1 ја одложи и Големата награда на Канада

Трката на легендарната патека во Монтреал требаше да се вози на 14 јуни, но поради пандемијата на коронавирусот и оваа Formula 1 трка е одложена

Продолжува серијата на откажување на трки во двете најмоќни организации во автомото спортот, Formula 1 и Moto GP, а за сето тоа е виновна пандемијата на коронавирусот. Moto GP во текот на вчерашниот ден одлучија да ги откажат трките во Италија и Каталонија, а сега на истиот чекор се одлучија и раководните лица на Formula 1 кои одлучија да ја одложат трката за Големата награда на Канада. Оваа трка, која се вози на легендарната патека „Gilles Villeneuve“, беше планирана за 14 јуни, а новиот датум се уште не е одреден.

Formula 1 е во големи проблеми бидејќи сезоната не ни започна, а планирано беше да започне со на 9 март традиционално на Големата награда на Австралија, но истата е целосно откажана, исто како и трката во Монте Карло, додека шест трки се одложени (Бахреин, Виетнам, Кина, Холандија, Шпанија и Азербејџан). Моменталната цел на раководството на натпреварувањето е да се извозат 15 до 18 наместо првично предвидените 20 трки.

По одложувањето на трката во Канада значи дека првата следна трка која би можела да се одржи оваа сезона е Големата награда на Австрија која е закажана за 5 јули. По неа следува Големата награда на Британија закажана за 19 јули. Од Силверстоун веќе најавија дека за одржувањето на трката ќе одлучуваат кон крајот на април.

Клучни зборови

Поврзани вести

Back to top button
Close