Hyundai ја претстави спортската Kona N

N семејството на Hyundai доби уште еден член и тоа првиот кросовер во поставата, а станува збор за малата Kona која се приклучува на i20 N, i30 N и Veloster N

Hyundai ја претстави целосно новата Kona N кој е првиот N кросовер, моделот нуди „победничка комбинација на разноликост, одлично забрзување, агилност и подотвеност за тркачките патеки“. Со оглед на тоа дека станува збор за перформансен модел, купувачите под хаубата ќе најдат 2,0-литарски четирицилиндричен мотор кој испорачува 280 КС и 392 Nm максимален вртежен момент. Но, ова може да се зголеми и на 290 КС со користење на N Grin Shift функцијата.

Моторот е поврзан со осумстепен автоматски менувач со двојна спојка кој содржи голем број модификации за високоперформансно користење. Меѓу промените се специјално тјунираниот сооднос на брзините и уникатно калибрираната контрола единица која овозможува побрзо менување на брзините.

Благодарение на моќниот мотор и перформансниот менувач, Kona N може да забрза од 0 до „стотка“ за 5,5 секунди при користење на Launch Control. Максималната брзина која спортскиот и перформансен кросовер може да ја достигне е 240 километри на час.

Kona N

Кога станува збор за перформансите, треба да се напомене дека Kona N има N Grin Shift, N Power Shift и N Track Sense Shift функции. N Grin Shift ги максимизира перформансите на моторот и трансмисијата на околу 20 секунди, додека N Power Shift се активира за време на забрзувањето и го максимизира вртежниот момент при менување на брзините. N Track Sense Shift го оптимизира менувањето на брзините за поспортско возење.

Перформансните карактеристики на кросоверот не завршуваат тука, бидејќи истиот пристигнува опремен со 19-инчни тркала, заедно со високоперформансен сопирачки систем. Kona N исто така доаѓа и со дифефренцијал со електронско ограничено пролизгување, кој нуди „максимизирана забава во свиоците“. Меѓу останатите карактеристики тука е варијабилниот издувен систем, засилената структура и пет возачи режими – Eco, Normal, Sport, N и Custom.

Kona N

Агресивен дизајн на екстериерот и спортски ентериер

Новата Kona N се одликува со агресивен екстериер кој е еволуција на Kona N Line. Промените се веднаш воочливи со оглед на тоа дека високоперформансниот модел отскокнува благодарение на уникатната решетка и црвените акценти. Кросоверот исто така има и заштитни пластики во боја на каросерија, спортски странични прагови и преден спојлер.

Kona N

Поголеми промени има на задниот дел каде што Kona N го добива третото триаголно стоп светло и дводелниот спојлер кој ја зголемува потисната сила. Моделот исто така добива и огромен двоен издувен систем и N обележја. На крајот, Kona N ќе биде достапна со ексклузивна Sonic Blue боја, која е нова нијанса од Performance Blue на Hyundai.

Унапредувањата продолжуваат и во внатрешноста, каде што возачите ќе најдат спортски управувач со N спецификации и head-up екран кој дава нова димензија во N или Sport возачките режими. Тука е и дигиталниот инструмент кластер и 10-инчниот инфозабавен систем со стоперка и мапа на тркачките патеки. Исто така, Hyundai го опреми Kona N со спортски педали и спортски седишта со N лого, а дизајнерите додадоа и Performance Blue акценти.

Секако, моделот пристигнува со голем број на безбедносни и системи за асистенција, а повеќе детали за Kona N ќе бидат објавени кога автомобилот ќе се доближи до своето лансирање, но од Hyundai истакнуваат дека моделот ќе биде релативно пристапен кога станува збор за цената.

Поврзани вести

Back to top button