Минхен 2025: Škoda Vision O е електричната иднина на Octavia

Škoda на саемот во Минхен ја претстави концептната верзија Vision O, компактен караван кој директно најавува што може да се очекува од новата генерација Octavia. Иако брендот последниве години силно се фокусира на SUV сегментот, Vision O покажува дека Octavia останува столб на гамата – модел што во електрична форма ќе продолжи да игра клучна улога и по 2028 година.

Дизајн со карактер и препознатлив изглед

Vision O ја носи најновата дизајнерска филозофија Modern Solid. Иако делови како задните врати што се отвораат наназад и 3D-печатаните потпирачи за глава се повеќе шоу-детали, поголемиот дел од дизајнот ќе биде присутен и во серискиот модел.

Со рамни крила, затемен C-столб и впечатлив заден дел со LED-осветлени Škoda букви, концептот нуди многу посилен визуелен настап од досегашната Octavia. Агресивната предна маска и јасните линии дополнително ја нагласуваат модерната насока на дизајнот.

Внатрешност со Horizon Display

Интериерот ја прикажува визијата на Škoda за дигиталната иднина. Наместо класичен инструментален панел, Vision O располага со Horizon Display долг 1,2 метри, кој се протега речиси целосно низ основата на шофершајбната. Дополнително, поставен е вертикален таблет-дисплеј, придружен од конзола со ротирачки контролер со хаптички повратен одговор и две подлоги за полнење телефони.

Тука е и дигиталниот асистент Laura AI, кој преку гласовни команди може да управува со повеќе функции. Просторноста останува силна страна – со должина од 4.850 мм, Vision O е поголем од сегашната Octavia, а багажникот собира импресивни 650 литри.

Практични детали и технологија

Škoda останува верна на практичноста – концептот има интегриран мини-фрижидер, пренослив Bluetooth звучник и дури четири чадори. Таквите решенија ја потврдуваат ориентацијата кон семејна и бизнис публика.

Во однос на платформата, Octavia ќе се базира на новата VW SSP архитектура, иста што ќе ја користи и идниот VW ID. Golf. Според првичните најави, сериската верзија ќе добие 800-волтна технологија за полнење и напреден софтвер развиен во соработка со Rivian.

Производство и идни планови

Серискиот модел на новата Octavia EV се очекува во 2027/2028 година. Освен караван верзијата, ќе се нуди и fastback изведба, а според извори блиски до Škoda, во план е и спортска vRS верзија со уште поагресивни перформанси.

Со Vision O, Škoda покажува дека Octavia ќе остане главен столб на продажбата и во ерата на електрификацијата, нудејќи баланс меѓу традиција, практичност и современа технологија.