Porsche AG го основа „Домот на спортските автомобили“

Porsche официјално го зголеми својот удел во Manthey Racing GmbH на 67 проценти, отворајќи ново поглавје во долгогодишното партнерство меѓу двете компании. Потегот е дел од новата стратегија „Sportwagenschmiede 35“, во чии рамки германскиот производител го формира и таканаречениот „Дом на спортските автомобили“ (House of Sports Cars), со цел дополнително да ја прошири понудата на модели со високи перформанси, ексклузивни изведби и програми за индивидуализација.

Со новата стратегија, Porsche сака уште повеќе да ја зајакне својата позиција во сегментот на спортски автомобили преку развој на специјални модели, пакети за подобрување на перформансите и уникатни искуства на тркачките патеки.

Три столба на новата стратегија

Под името „Дом на спортските автомобили“, Porsche ќе ги обедини своите активности во три главни области – Performance, каде што ќе биде вклучен и Manthey, Exclusivity преку програмите Sonderwunsch и Exclusive Manufaktur, како и Heritage, насочен кон зачувување и развој на наследството на брендот.

Компанијата најавува дека постојната понуда за индивидуализација дополнително ќе се проширува, а соработката со Manthey ќе добие уште поважна улога во развојот на идните производи.

„Manthey е доверлив партнер на Porsche многу години, цврсто вкоренет во моторспорт заедницата и со лојална база на клиенти. Имаме намера дополнително да ја развиваме таа приказна. Со зголемувањето на нашиот удел ќе можеме уште поблиску да соработуваме на специјални модели, пакети за перформанси и ексклузивни искуства на тркачките патеки“, изјави извршниот директор на Porsche, д-р Мајкл Лајтерс.

Manthey останува клучен партнер

Manthey зад себе има три децении искуство во GT програмите и моторспортот, со импресивна историја која вклучува седум вкупни победи на легендарната 24-часовна трка на Нирбургринг, шест класни победи на Ле Ман, повеќе титули во FIA WEC и шампионати во DTM.

Во изминатите години, Porsche и Manthey заеднички развија девет Manthey пакети за различни модели, почнувајќи од семејствата 911 и 718, па сè до најновиот Taycan Turbo GT со Weissach пакет.

Со новата сопственичка структура, Porsche планира дополнително да го прошири присуството на Manthey не само кај GT моделите, туку и во поширокиот сегмент на спортски автомобили со високи перформанси.

Следуваат специјални модели

Извршните директори на Manthey Racing, Николас и Мартин Раедер, истакнаа дека зголемувањето на уделот претставува признание за долгогодишната успешна соработка меѓу двете компании.

Според нив, новата фаза ќе овозможи уште подобро искористување на заедничките ресурси и знаење, како и уште посилна поврзаност меѓу моторспортот и сериските модели на Porsche.

Првите резултати од проширената соработка ќе бидат претставени веќе на 9 октомври, кога Manthey ќе открие два специјални модели по повод 30-годишнината на компанијата, за време на DTM викендот на патеката Хокенхајмринг.

Воедно, тимот ќе атакува и на третата титула во DTM во последните четири години. Томас Прајнинг моментално е лидер во генералниот пласман кај возачите со предност од 23 поени, додека Manthey го предводи тимскиот шампионат со 20 поени предност пред последниот тркачки викенд од сезоната.