Renault го претстави Scenic Vision концептот со водороден погон

Renault го претстави долгоочекуваниот концепт погон на водородни ќелии, кој изненадувачки ја добива ознаката Scénic. Renault Scénic Vision е радикално различен од сите негови претходници, доаѓа со каросерија во стилот на SUV, која го најавува изгледот на сериското возило кое треба да биде претставено во 2024 година. Она што е најважно, тој е опремен со неконвенционален хибриден погон кој комбинира електричен мотор со продолжувач на опсегот на водородни горивни ќелии.

Најголемото внимание кај концептот привлекува  технологијата H2-Tech која има за цел да го намали времето на застој поврзано со полнењето и јаглеродот. Погонската група се состои од електричен мотор поставен напред кој произведува 218 КС, систем на водородни горивни ќелии за продолжување на опсегот што генерира 22 КС и батерија од 40 kWh. Оваа хибридна поставка му овозможува на возилото да носи двојно полесна батерија за истиот опсег. Според Renault, Scénic Vision има 75 проценти помал карбонски отпечаток од конвенционално електрично возило со батерии. По 2030 година, кога мрежата на водородните станици се очекува да се прошири, компанијата очекува домет до 800 километри со време на полнење на водород од околу пет минути.

Експериментална платформа и футуристички стил

Концептот кој се заснова на експериментална платформа има поголем отпечаток од Mégane E-Tech со димензии 4.490 милиметри должина, 1.900 ширина и 1.590 милиметри висина, додека меѓуоскиното растојание изнесува 2.835 милиметри. Според Renault, тежината е 1.700 kg, што е блиску до Mégane со највисокото ниво на опременост и покрај додавањето на водородни горивни ќелии.

Кога станува збор за стајлингот, концептот ја прифаќа најновата еволуција на дизајнерскиот јазик на Renault со силно извајано тело, силни карактерни линии и футуристички детали. Силуетата јасно го нагласува дистанцирањето од MPV минатото на Scénic. На предната страна, тенките LED фарови имаат агресивен изглед, со дополнителни LED единици поставени подолу. Профилот е доста динамичен благодарение на неконвенционалната површина на вратите и научно-фантастичните тркала од 21 инчи. На задната страна се истакнуваат LED задните светла во форма на бумеранг, осветлениот беџ и истакнатиот заден спојлер. Главниот дизајнер Жил Видал изјави дека концептот е 90 отсто подготвен за производство, притоа наведувајќи дека надворешниот дизајн ќе се развива.

Напредни технологии

Во кабината се истакнува концептуалниот стил. Меѓу карактеристиките се широките пловечки седишта, низа мали екрани во форма на правоаголник, обвиен екран на горниот дел од контролната табла, волан во форма на јарем и амбиентално осветлување.

Широкиот екран може да пренесува во живо од надворешната камера, зголемувајќи го видното поле на возачот за 24 проценти. Системот за препознавање лице автоматски ги отвора вратите и ги прилагодува поставките на возилото на профилот на возачот и секое седиште е опремено со микрофони и звучници за личен звук и оптимална комуникација меѓу патниците. Има и Safety Coach кој се грижи дека возачот е здрав и внимава на патот додека му помага да ги подобрат своите возачки навики.

Во однос на материјалите, Scénic Vision е доказ за еколошкиот начин на размислување на Renault и фокусирањето на одржливоста. Над 70 отсто од материјалите што се користат на возилото се рециклирани, а 95 отсто се рециклираат. Внатрешноста е без кожа со рециклиран полиестер со низок  карбонски отпечаток за тапацирот, додека 30 проценти од пластиката е биоразградлива.

Како што веќе споменавме, концептот го прикажува серискиот модел кој ќе биде претставен во 2024 година. Овој ќе го замени електрично-водородниот погон за поконвенционален електричен погон на батерии и ќе се заснова на продолжена верзија на архитектурата CMF-EV што ќе биде нашироко користена од алијансата Renault-Nissan-Mitsubishi во наредните години.

Што се однесува до употребата на водород, Renault веќе нуди производни LCV со горивни ќелии под брендот HYVIA и ќе го продолжи развојот на експерименталната водородно-електрична архитектура за потенцијална употреба во идните модели.