Renault Kangoo доби своја електрична E-Tech варијанта

Францускиот производител Renault продолжува да ја проширува својата понуда на електрични возила, додавајќи ЕВ варијанта во опсегот на речиси секој свој модел. Renault Kangoo Van E-Tech Electric пристигнува со 300 километри опсег, а ќе биде достапен на европскиот пазар почнувајќи од пролет следната година, заедно со дизел и бензинската варијанта.

Renault продаде околу 70.000 електрични Kangoo комбиња во Европа од 2011 година и цели кон уште поголема застапеност на новата генерација со оглед на тоа дека лесните комерцијални возила со нулта емисија на штетни гасови имаат се поголема популарност.

Кога станува збор за погонот, Renault Kangoo Van E-Tech Electric е опремен со електромотор кој испорачува 122 КС и 245 Nm вртежен момент. 45 kWh батерија нуди опсег од 300 километри според WLTP циклусот, што е повеќе од она што го нудат неговите ривали. Исто така, батеријата е поставена во подот на возилото, така што не влијае на багажниот капацитет.

Renault нуди три типови на полначи – стандардниот 11 kW за домашни услови, опционалниот 22 kW за јавни терминали и 80 kW брз полнач. Кога е вклучен во 11 kW ѕиден приклучок, на батеријата и се потребни 3 часа и 50 минути за да се наполни од 15 до 100 проценти, додека 80 kW полнач носи 170 километри опсег со само 30 минути полнење.

Исти способности како конвенционалните верзии

Kangoo E-Tech Electric пристигнува со шест возачки режими, вклучително и Eco кој ја намалува моќноста на возилото во корист на продолжување на опсегот. Возачот може да се избере меѓу три нивоа на регенеративно сопирање – Sailing, Drive и Brake, со тоа што последната опција го вади најдоброто од системот за адаптиво регенеративно сопирање, кој работи заедно со конвенционалното хидраулично сопирање.

Електричниот Kangoo ги има истите способности како и варијантите со конвенционален мотор, вклучително и 1,45 метри широките странични отвори, 3,9 кубни метри товарен простор, 600 килограми капацитет за товарење и 1.500 килограми влечен капацитет. Во блиска иднина, Renault ќе понуди и варијанта со продолжено меѓуоскино растојание од Kangoo E-Tech со 4,9 кубни метри карго простор и 800 килограми товарен капацитет.

Како дел од опционалната опрема за моделот е 8-инчен екран на допир за Renault Easy Link инфозабавата, 10-инчен дигитален инструмент кластер, греење на предното стакло, греење на предните седишта, греење на управувачот како и цела на низа на системи за асистенција вклучително и адаптивен темпомат со Start & Stop систем.

Renault Kangoo Van E-Tech Electric ќе се произведува во Франција заедно со остатокот од Kangoo опсегот и Mercedes-Benz Citan и Nissan Townstar моделите.