Xpeng G9L е новиот кинески адут за Европа

Новиот знаменосец на Xpeng дебитира на европскиот пазар со електрична и EREV изведба, до 577 КС, домет до 1.602 километри и цена што е значително пониска од германските ривали

Кинескиот производител Xpeng продолжува агресивно да ја шири својата понуда во Европа, а по премиерата на Салонот за автомобили во Париз го претстави својот нов предводник – G9L. Големиот SUV ќе биде достапен во целосно електрична и EREV (Extended Range Electric Vehicle) изведба, со што директно ќе им конкурира на премиум модели како BMW X5, Audi Q7 и Mercedes-Benz GLE.

Покрај Европа, Xpeng G9L ќе се продава и на уште 64 светски пазари, а производството ќе се одвива во Кина, како и во фабриката на Magna Steyr во Австрија.

Пониска цена од европските конкуренти

Во Германија, новиот Xpeng G9L стартува со цена од 74.600 евра, додека на останатите европски пазари, меѓу кои Франција, Австрија и Холандија, цената се движи од 74.990 до 75.990 евра. Со тоа, новиот кинески SUV е значително поевтин од етаблираната европска премиум конкуренција, чија почетна цена на германскиот пазар изнесува далеку повеќе.

Со ваквата ценовна политика, Xpeng јасно покажува дека има амбиција да привлече купувачи кои досега традиционално се определуваа за германските премиум брендови.

EREV технологија со домет до 1.602 километри

Особено внимание привлекува EREV изведбата, која комбинира 1,5-литарски турбо бензински мотор со електромотор и литиум-железо-фосфатна батерија со капацитет од 63 kWh.

Системската моќност достигнува 577 коњски сили и 695 Nm вртежен момент, што овозможува забрзување од 0 до 100 km/h за 5,4 секунди.

Според Xpeng, G9L EREV може да помине до 435 километри само на електрична енергија, додека комбинираниот домет според кинескиот CLTC циклус достигнува дури 1.602 километри.

Бензинскиот мотор нема механичка врска со тркалата, туку служи исклучиво како генератор за производство на електрична енергија, што овозможува возењето да остане мазно и тивко, како кај класичен електричен автомобил.

До 540 kW моќност на полнење

Покрај EREV верзијата, Xpeng ќе понуди и две целосно електрични изведби.

Основниот модел располага со батерија од 91,9 kWh, додека помоќната верзија добива батерија со капацитет од 110 kWh. Најсилната варијанта исто така испорачува 577 коњски сили и 695 Nm, а според WLTP циклусот обезбедува автономија до 553 километри.

Една од најголемите предности е можноста за DC полнење со моќност до 540 kW, што овозможува батеријата да се наполни од 10 до 80 проценти за помалку од 12 минути.

Напредни системи за асистенција

G9L е опремен со најновите интелигентни системи за асистенција на Xpeng, меѓу кои градско и автопатско асистирано возење, навигациски асистент и автоматско менување лента без интервенција на возачот.

Компанијата посветила големо внимание и на луксузот во кабината, која треба да ги привлече купувачите што досега избирале премиум европски SUV модели.

Луксузна кабина со богата опрема

Во предниот дел се вградени Nappa кожни седишта со греење, вентилација и функција за масажа со 16 програми. Вториот ред може да биде конфигуриран со класична клупа или две индивидуални „капетански“ седишта, кои исто така располагаат со греење, вентилација и масажа.

Третиот ред нуди загревање на седиштата и можност за преклопување во однос 50:50.

Меѓу останатата опрема се издвојуваат 17,3-инчниот централен инфозабавен екран, огромен 88-инчен head-up дисплеј со проширена реалност, безжични полначи за два телефона, аудио систем со 26 звучници, фрижидер со капацитет од 12,5 литри, како и 21,4-инчен преклопен екран за патниците на вториот ред.

Со G9L, Xpeng испраќа јасна порака дека кинеските производители повеќе не конкурираат само со пониска цена, туку и со технологии, перформанси и ниво на опременост што директно се спротивставуваат на етаблираните европски премиум брендови.