Тест Citroen C3: Херојот на урбаното секојдневие

Во ера кога цените на автомобилите достигнуваат апсурдни височини, вистинско освежување е да се сретне целосно нов модел кој успева да плови спротивно од струјата.  Ова е од особена важност доколку истиот нуди балансиран микс од респектабилен квалитет, практичност и неизбежен француски шарм, кој по правило секогаш остава впечаток.

Се чини дека Citroen совршено владее со уметноста на создавање компактни и привлечни автомобили. Со текот на времето, нивната формула еволуира, а тоа јасно се чувствува при првиот контакт со најновата генерација на C3. Инженерите и дизајнерите на брендот мудро одлучиле да ја задржат јасноста и едноставноста како главни приоритети, нудејќи три нивоа на опременост, три опции за моторизација и палета од шест бои за надворешноста. Оваа стратегија сугерира дека понекогаш, минимализмот е најдобриот пат до срцето на купувачите.

Оригиналноста како заштитен знак

Најновата генерација на C3 носи смела и модерна естетика, нагласувајќи го новиот правец во кој се движи Citroen-овиот дизајн. Надворешниот изглед е комбинација од динамични линии, функционалност и урбана привлечност. Забележавме дека многу детали кои компанијата ги прикажа во 2022 година на концептинот модел Oli, свое место пронашле кај моделот С3, што е секако за поздрав.

Дизајнот остава впечаток на прв поглед. Иако вкусовите се субјективни, тешко е да се сретнете со овој автомобил и да не го оцените како привлечен. Марката успеа да постигне баланс помеѓу едноставноста и модерниот изглед, умешно избегнувајќи ги пренагласените елементи кои често знаат да бидат неумесни. Опционалната двобојна каросерија му дава дополнителна естетска вредност, а неговата зголемена висина од над 10 см (во споредба со претходниот модел) донекаде му додава SUV-изглед, без да го жртвува духот на компактниот автомобил. Сепак, C3 не е кросовер, иако многумина можеби ќе го доживеат на тој начин, таа улога во гамата на Citroen му е доделена на C3 Aircross чија втора генерација се очекува на нашиот пазар да пристигне во првата половина од 2025 година.

Овој автомобил ги следи и подобрува начелата кои неговите предходници ги поставиле. Робусниот став е изразен преку заштитните елементи окулу тркалата, чистите линии балансираат помеѓу современиот стил и практичноста, додека динамиката дискретно се појавува во вид на спојлер поставен над вратата од багажникот. Со новиот надворешен изглед, C3 ја задржува оригиналноста која е заштитен знак на марката, што пак го издвојува од конкурентите и му возможува добра стартна позиција во трката каде сите производители претендираат да владеат со урбаните средини.

Мудра комбинација на фунционалност и стил

Во ентериерот C3 нуди пријатна атмосфера и функционалност, особено во верзијата која ни беше одстапена на неколкудневно дружење. Иако материјалите се со потврда компонента нивната употреба е мудро комбинирана со естетски акценти, како што е текстилната трака која се протега низ подножјето на инструмент таблата. Креативноста продолжува преку мали мотивациски пораки испишани на етикети кои се прикачени на вратите. Интересен е и т.н „head-up“ дисплеј, што ги заменува класичните инструменти пред возачот каде дигиталниот брзинометар и информациите за патувањето се проектираат на рефлектирачка површина пред вас. Ваквиот пристап овозможува лесно читање на виталните податоци преку управувачот со две краци кој не само што изгледа одлично, туку и нуди исклучително чувство при користењето.

Возачката позиција е малку повисока отколку во повеќето конкурентски автомобили, што генерално допринесува за подобра видливоста низ високите странични прозорци. Кога сме веќе на темата седишта, тие во последно време се едно од најсилните страни на Citroen во поглед на  удобноста.. Просторот на задниот дел од кабината е во рамките на класата, со тоа што простор за главата имаат и лица со висина од 2 метри. Багажникот нуди капацитет од 310 литри, што е сосема доволно за секојдневните потреби, а со спуштање на задните седишта просторот се зголемува на 1.188 литри што пак е доволно за транспорт и на погабаритни предмети.

Што се однесува до инфозабавниот екран кој користи дијагонала од 10.25 инчи може да кажеме дека неговиот систем е воден по принципот на едноставност каде што примарна цел е да биде лесен за командување. Самиот систем поддржува Android Auto и Apple CarPlay, што воедно овозможува да ги користите апликациите од вашиот телефон преку екранот на автомобилот. Контролата на климатизација е преку физички копчиња што драстично ја олеснува употребата во споредба со системите кои бараат користење на инфозабавниот систем за прилагодување на наједноставните поставки.

Удобноста во прв план

Како во поглед на опременоста, така и во моторната понуда, ситуацијата е повеќе од јасна на самиот почеток. Доколку сакате класичен бензинец, тогаш добивате 1.2 литраски агрегат и мануелен менувач, ако сте наклонети кон хибридните изведби тогаш истиот агргат со мала батерија и подршка од исто така мал електромотор ќе ве поштедат од рачно менување на брзините, а доколку сте еколошки освестени и сакате да возите само на струја, не грижете се, Citroen ве покрива и од таа страна со целосно електричната верзија на е-С3.

Во нашиов случај под предниот поклопец на C3 е сместен добро познатиот 1.2 литарски трицилиндричен турбо бензинец од серијата „PureTech“. Овој мотор долго време е дел од Stellantis групацијата што покажува дека понекогаш едноставноста е најдобрата стратегија. Покрај тоа што бројката од 101 КС не ветуваат спортски постигнувања, неговата имплементација се докажува како ефикасна и забавна за возење благодарение на влечната сила од 205 Нм што во автомобил со тежина помала од 1.2 тони овозможува одлични перформанси. Во целата приказна голема улога игра и рачниот шест брзински менувач кој е добро пресметан и лесен за ракување. Моторот работи доста тивко и не пренесува вибрации, економиченоста е неговата доблест.

Декларираната просечна потрошувачка изнесува  5.7 л/км, во реалност и во зависност од условите истата е за 0,5 до 1 литар повисока, но не повеќе од 7 л/км, што го прави одличен избор за секојдневна употреба. Сепак, она што го издвојува C3 од конкурентите е неговата ненадмината удобност. Благодарение на „Advanced Comfort“ суспензијата, автомобилот успешно ги апсорбира нерамнините на патот и обезбедува мирно и стабилно возење, додека леснотијата при маневрирањето низ тесните улици доаѓа како уште еден плус. Иако неговата динамика не е во фокусот, автомобилот покажува дека е повеќе од способен да одговори на секојдневните потреби на урбаните возачи. Со овие карактеристики успева да се издвои како еден од најудобните автомобили во својата класа.

Новата генерација на Citroen C3 се истакнува со стилот, функционалноста и удобноста. Овој автомобил е замислен како совршен партнер за урбаниот живот, нудејќи практичност, економичност и уживање во возењето. Со својот свеж пристап, Citroen уште еднаш покажува дека знае како да креира автомобил по мерка на модерните возачи.

Цена на тестираниот модел: 20.190 евра

Технички податоци за Citroen C3 PureTech 100 S&S BVM6 Max

Citroen C3 во Македонија

Повеќе информации во Автонова на тел. (0) 2 3093 011 или на www.citroen.com.mk

Конкуренти:

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.