Hyundai ја претстави својата нова генерација на хибридни погонски системи

Hyundai Motor Group ги откри деталите за својата најнова генерација хибридни погони, кои дебитираа со редизајнираниот Palisade. Новата технологија ветува значително подобрување на перформансите, намалена потрошувачка на гориво и поширока примена низ различни модели.

Нов менувач со две електромотори

Во срцето на новиот хибриден систем се наоѓа менувач со два интегрирани електромотори. Првиот е задолжен за стартување, регенерација на енергија и асистенција при забрзување, додека вториот се користи за погон и регенеративно сопирање. Hyundai тврди дека оваа конфигурација „ја зголемува моќта, перформансите и ефикасноста, овозможувајќи прецизно менување на брзини и намалени вибрации и бучава.“

Опсег на конфигурации и перформанси

Новиот систем е дизајниран за да се комбинира со различни мотори. Првата конфигурација користи 2.5-литарски турбо мотор, а подоцна ќе биде достапна и варијанта со 1.6-литарски турбо. Hyundai најави дека комбинираниот излез ќе се движи од околу 100 КС (74 kW) до над 300 КС (221 kW), во зависност од моделот.

2.5-литарскиот мотор доби подобрен проток на цилиндри, нови клипови и ажурирана горивна инјекција, со што се постигнува висока ефикасност, оптимизирана специјално за хибриди. Пренесувањето на функциите за стартување и генерирање енергија директно на менувачот, исто така, придонесува за минимизирање на загуби во енергијата.

Податоци за перформанси и ефикасност

Во новиот Hyundai Palisade, 2.5-литарскиот хибриден мотор испорачува 329 КС (246 kW) и 460 Nm вртежен момент – што е за 19% повеќе моќност и 9% повеќе вртежен момент од неговата стандардна турбо верзија. Дополнително, хибридниот систем нуди за 45% подобра економичност на горивото.

Наскоро ќе следува и 1.6-литарска хибридна верзија во непознат SUV од средна класа, која ќе постигне 4% подобрување на потрошувачката и дополнителни 13 Nm вртежен момент.

Напредни технологии инспирирани од ЕВ модели

Hyundai не застанува тука – новата платформа вклучува и e-AWD систем со електромотор на задната оска, кој обезбедува подобро управување и стабилност во сите услови. Новитети како e-Handling 2.0, e-Ride 2.0, V2L, Stay Mode и Smart Regenerative Braking се преземени од електричните возила и обезбедуваат повисоко ниво на удобност и функционалност.

„Stay Mode“ овозможува користење на батеријата за напојување на климата и инфо-забавниот систем без да се вклучи моторот, а функцијата V2L овозможува напојување на надворешни уреди – совршено за теренска работа или дружење на отворено.

Широка примена низ брендовите Hyundai, Kia и Genesis

Hyundai Motor Group најавува дека новите хибридни системи ќе се применуваат низ целата гама – од компактни до луксузни модели. Genesis, на пример, ќе добие 2.5-литарски турбо хибрид за возила со погон на задните тркала во 2026 година, по што технологијата ќе се прошири и кај други модели од премиум сегментот.

Новата генерација на хибридни системи е уште еден доказ за стратегијата на Hyundai да биде лидер во електрификацијата, без компромис кога станува збор за перформанси и возачко уживање.