Škoda го претстави тркачкиот концепт Enyaq RS Race

По минатогодишниот Enyaq RS Race концепт, Škoda сега ја претстави новата, освежена верзија базирана на фејслифтираниот Enyaq Coupe. Овој нов концепт возило не само што е значително полесен од серискиот модел, туку истовремено истражува иновативни и одржливи решенија кои потенцијално би можеле да се најдат и кај идните производни возила на чешкиот бренд.

Лесни биокомпозити од леново влакно

Главниот акцент кај новиот Enyaq RS Race концепт е ставен на намалување на тежината. Возилото е опремено со низа биокомпозитни компоненти направени од ленови влакна – материјал кој нуди цврстина и леснотија слична на карбонските влакна. Овие делови, како што велат од Škoda, се “пилот-проект“ за идни сериски модели.

Со овие материјали се изработени браниците, крилата, кровот и задното крило, а истите можат да се најдат и во внатрешноста на возилото – на таблата со инструменти, вратите и потпирачите за нозе. Дополнително, прозорците се заменети со поликарбонатни, што придонесува за вкупно намалување на тежината од 316 килограми во споредба со серискиот Enyaq Coupe RS.

Аеродинамика инспирирана од тркачки патеки

Новитетот добива широка каросерија со агресивни браници, нови отвори за воздух, аеродинамично оптимизиран покрив и голем дифузер. Минималистичките ретровизори дополнително ја намалуваат отпорноста на воздух. Концептот се движи на лесни 20-инчни тркала од OZ Racing и користи карбон-керамички сопирачки со 10-клипни и 4-клипни калиперки.

Внатрешност подготвена за тркачка патека

Внатрешноста на Enyaq RS Race е целосно минимализирана, со фокус на функционалност и безбедност. Возачот располага со 5-инчен дигитален инструмент кластер и 13-инчен инфозабавен систем. Брзо-ослободувачкиот волан, ролбарот и тркачките седишта Atech со појаси со шест точки дополнително го зацврстуваат тркачкиот карактер.

Интересно е што возилото има и автоматски систем за гаснење пожар, како и Havas премиум звучен систем кој емитира “возбудлив тркачки звук“ при брзини над 30 km/h.

Подвозје калибрирано како Fabia RS Rally2

Škoda вложи дополнителен труд во подвозјето на концептот, со цел да се постигне динамика слична на онаа кај Fabia RS Rally2. Возилото има спортска суспензија со прилагодливи амортизери, хидраулична рачна сопирачка, предни и задни диференцијали со ограничено лизгање и намалена висина од 70 милиметри.

Погонот останува ист како кај серискиот модел – двоен електромотор со погон на сите тркала и вкупна моќност од 340 КС (250 kW). Забрзувањето од 0 до 100 km/h трае помалку од пет секунди, а максималната брзина изнесува 180 km/h.

Потенцијален правец за иднината на Škoda

Enyaq RS Race не е само шоукар, туку претставува платформа за тестирање на одржливи технологии и материјали кои би можеле да се применуваат и кај идни сериски возила. Со вакви проекти, Škoda не само што ја зацврстува својата посветеност на електрификацијата, туку и на одговорниот пристап кон мобилноста на иднината.