FIA размислува за враќање на V8 моторите во Formula 1 до 2029 година
FIA сака да ги врати атмосферските V8 мотори во Formula 1 до 2029, со фокус на пониски трошоци, синтетички горива и делумна електрификација
Formula 1 наскоро би можела да го врати препознатливиот звук на атмосферските V8 мотори. Претседателот на FIA, Мохамед Бен Сулајем, изјави дека постои реална можност 2.4-литарските V8 мотори повторно да бидат дел од спортот веќе од сезоната 2029.
Откако во 2014 година беа воведени актуелните 1.6-литарски V6 турбо хибридни погонски единици, критиките не престануваат. Иако новите мотори се поефикасни и поеколошки, нивната комплексност и астрономските трошоци за развој и производство стануваат сè поголем проблем за тимовите. Според Бен Сулајем, истражувањето и развојот на актуелните мотори достигнува 200 милиони долари, додека цената на една единица се движи од 1.8 до 2.1 милиони долари.
Едноставни мотори со модерен пристап
Враќањето на V8 моторите би значело враќање кон поскромни и полесни погонски единици. Според FIA, новите V8 мотори би биле атмосферски, но би користеле синтетички горива и би задржале некаква форма на електрификација, со цел да се задржат еколошките цели на спортот. Овој чекор би ги намалил трошоците, би ја зголемил конкурентноста меѓу тимовите и би го вратил возбудливиот звук кој некогаш ја дефинираше Formula 1.
Поддршка од тимовите и Formula 1
Претседателот на FIA истакна дека и Formula 1 менаџментот (FOM), како и дел од тимовите, се веќе наклонети кон идејата. „Оптимист сум, ова е правецот кој мора да го следиме. Ако сакаме промена до 2029 година, мора да почнеме да работиме сега“, изјави Бен Сулајем за време на Големата награда на Велика Британија.
Комбинација на традиција и одржливост
Иако се размислувало и за враќање на V10 моторите, V8 конфигурацијата се смета за пореална опција поради полесната интеграција во болидите и поголемата сличност со моторите што се користат во автомобилската индустрија. Синтетичките горива и електрифицираните системи ќе овозможат задоволување на еколошките стандарди, додека ќе се врати спектаклот на патеките.
Дали Formula 1 ќе го врати славниот звук на V8 моторите и ќе го разбуди ентузијазмот кај навивачите, останува да видиме во наредните години. Но, според најавите од FIA, промените веќе се на повидок.
