Audi го претстави новиот Q3 Sportback

Audi ја заокружи понудата на новата генерација Q3 со претставување на Q3 Sportback – купе-SUV верзија која нуди поелегантна силуета и спортски карактер, но ја задржува најголем дел од технологијата и моторите од стандардниот Q3.

Дизајн и простор

Q3 Sportback се разликува од класичниот Q3 пред сè по линијата на покривот и стаклената површина, кои се спуштаат кон задниот дел за да создадат купе изглед. Недостасуваат кровните шини за уште поспортски став. Дизајнерите задржаа дел од деталите како задните целосни LED светла со OLED графика и спортскиот браник со голем дифузер.

Поради новата форма, Q3 Sportback е 29 мм пократок од класичната верзија, а намален е и багажниот простор – со спуштени задни седишта изнесува 1.298 литри, што е за 97 литри помалку од „стандардниот“ Q3.

Внатрешност и технологија

Кабината е идентична со Q3 и вклучува закривен панел со 11,9-инчен дигитален инструментален кластер и 12,8-инчен инфозабавен систем. Во зависност од нивото на опрема, достапни се и дополнителни системи за асистенција и премиум функции, со нови материјали и завршни детали.

Погонски опции

Новата генерација Q3 и Q3 Sportback се базира на MQB Evo платформата и ќе биде достапна со широка гама мотори – бензински, дизел, благи хибриди и плаг-ин хибрид. Базичниот модел 1.5 TFSI располага со 150 КС, помоќниот 2.0 TFSI нуди до 265 КС, а на врвот на понудата се наоѓа Q3 Sportback e-Hybrid со вкупно 268 КС и батерија од 25,7 kWh.

Хибридната верзија нуди електричен дострел до 118 км според WLTP циклусот, што е само еден километар помалку од класичниот Q3.

Продажба и цена

Во Европа, нарачките за двата модели веќе започнаа. Испораките на Q3 ќе започнат во октомври, додека Q3 Sportback ќе пристигне во ноември. Во Германија, цената на Q3 започнува од 44.600 евра, а Q3 Sportback од 46.450 евра. Плаг-ин хибридите се движат од 49.300 до 51.150 евра, во зависност од каросериската изведба.