Ferrari Luce: Првиот електричен Ferrari пристигнува со 1.035 КС и дизајн потпишан од креаторот на iPhone

Италијанскиот производител Ferrari официјално го претстави својот прв целосно електричен модел наречен Luce, автомобил кој означува почеток на нова ера за брендот од Маранело. Наместо класичен суперавтомобил со V8 или V12 мотор, Ferrari создаде футуристички четиривратен електричен модел со пет седишта, 1.035 коњски сили и радикален дизајн кој не личи на ниту еден Ferrari досега.

Новиот Ferrari Luce е развиен со помош на дизајнерското студио LoveFrom, основано од легендарниот Sir Jonathan Ive, човекот кој стои зад дизајнот на оригиналниот iPhone, заедно со Marc Newson. Резултатот е модел кој комбинира висока технологија, луксуз и перформанси со целосно нов пристап кон дизајнот на Ferrari.

Ferrari Luce не е класичен суперавтомобил

Од Ferrari велат дека Luce не треба да се гледа само како „електричен Ferrari“, туку како целосно нов производ кој треба да ја прошири иднината на брендот. За разлика од традиционалните модели на Ferrari, Luce има четири врати, простор за пет патници и голем заден hatch отвoр.

Под хаубата, односно под каросеријата, се крие систем со четири електромотори кои заедно испорачуваат 1.035 КС и 1.050 Nm вртежен момент. Благодарение на оваа конфигурација, Ferrari Luce забрзува од 0 до 100 km/h за само 2,5 секунди, додека максималната брзина останува во доменот на вистински суперавтомобил.

Дизајн инспириран од технологијата и иднината

Ferrari Luce носи целосно нов дизајнерски јазик. Автомобилот има чисти линии, минималистички пристап и т.н. „glass house“ концепт со големи стаклени површини и аеродинамични елементи.

Предниот дел е доминиран од масивен аеродинамичен елемент кој потсетува на Dodge Charger Daytona, додека LED светлата и предната маска се далеку помодерни од класичниот Ferrari стил. Огромните 23-инчни предни и 24-инчни задни тркала дополнително го нагласуваат драматичниот изглед.

Особено внимание привлекуваат задните „suicide“ врати и необичниот заден дел кој комбинира силуета на седан и hatchback. Ferrari посочува дека инспирацијата доаѓа од моделите 360 Modena и 458 Italia, иако Luce визуелно делува како автомобил од далечната иднина.

Ентериер со физички команди и напредна технологија

Во кабината Ferrari комбинира дигитални технологии со физички копчиња и прекинувачи – нешто што многу производители денес го напуштаат. Воланот е изработен од рециклиран алуминиум и е поврзан со подвижен инструмент панел кој постојано останува во линијата на погледот на возачот.

Ferrari Luce користи OLED екрани специјално развиени за овој модел, а интересен детал е и клучот со Gorilla Glass и E Ink технологија. При стартување, жолтата Ferrari графика се „разлева“ низ интерфејсот на кабината.

Моделот добива и масажни седишта, контроли за задните патници и аудио систем со 21 звучник и моќност од 3.000 вати.

Батерија од 122 kWh и 800V архитектура

Ferrari Luce користи батерија со капацитет од 122 kWh и напредна 800V архитектура. Благодарение на брзо DC полнење до 350 kW, автомобилот може да надополни околу 70 kWh енергија за само 20 минути.

И покрај тежината од 2.260 килограми, Ferrari тврди дека благодарение на ниско поставената батерија, torque vectoring системот и напредната шасија, Luce се управува како автомобил кој е околу 400 килограми полесен.

Батерискиот пакет не служи само за складирање енергија, туку е и структурен дел од шасијата, со што се добива 25 проценти поголема цврстина на каросеријата.

Ferrari создаде и уникатен звук за Luce

Еден од најинтересните елементи кај Ferrari Luce е системот за звук. Наместо вештачки синтетизиран звук како кај многу електрични автомобили, Ferrari користи реални вибрации од електромоторите кои се обработуваат и засилуваат слично како електрична гитара.

Возачот може сам да го прилагодува интензитетот на звукот, а Ferrari вели дека целта била Luce да понуди емоционално и автентично искуство и покрај тоа што нема класичен бензински мотор.

Продажбата на Ferrari Luce во Европа започнува подоцна оваа година, а почетната цена ќе изнесува околу 520.000 евра. Со Luce, Ferrari јасно покажува дека иднината на брендот нема да биде ограничена само на традиционалните суперавтомобили. Наместо тоа, Маранело влегува во нова ера во која електрификацијата, технологијата и луксузот ќе имаат еднакво важна улога како и перформансите.