Tест Jeep Compass: Електрификација која не го засенува карактерот

Пазарот денес е преполн со СУВ модели кои се повеќе личат еден на друг. Производителите по секоја цена брзаат кон електрификација, дигитализација и максимална ефикасност, но во таа трка многу од нив го губат сопствениот идентитет. Токму тука отсекогаш се издвојувал Jeep.

Како бренд што со децении ја гради својата репутација врз робусност, авантуристички дух и препознатлив дизајн, Jeep денес мора да одговори на новите пазарни барања. Новиот Compass е еден од најважните чекори во таа транзиција, модел кој има задача да го пренесе традиционалниот карактер на марката, но под каросеријата да носи модерна електрифицирана технологија насочена кон поголема ефикасност.

Препознатлив, но со далеку повеќе елеганција

Уште на прв поглед е јасно дека дизајнерите немале намера да експериментираат со препознатливиот идентитет на Compass. Автомобилот, како и досега, веднаш остава впечаток дека припаѓа на Jeep семејството, што во време кога многу СУВ модели визуелно се повеќе личат едни на други претставува сериозна предност. Па така, на предниот дел доминира легендарната маска со седум вертикални слотови, можеби најпрепознатливиот елемент во целата историја на брендот кој почетоците ги бележи уште во 1941 година.

Новата ЛЕД матрикс светлосна графика внесува модерна нота, додека агресивно обликуваниот браник и заштитни панели дополнително ја потенцираат СУВ филозофијата. Гледано од страна, Compass делува компактно, но во исто време доволно мускулесто. Нагласените лакови над тркалата, високата линија на каросеријата и карактеристичните пластични заштити јасно покажуваат дека и покрај урбаната ориентација, Jeep се уште сака да го задржи впечатокот дека е возило што е подготвено да оди подалеку од асфалтот.

На задниот дел доминираат хоризонталните светлосни склопови кои се поставени во куќишта што се поврзани со лента, но главната улога ја игра графиката со „X“-потпис. Хоризонтално поставените светлосни групи визуелно го прошируваат автомобилот, а чистите линии му даваат пософистициран изглед. Со должина од  4,55 метри, Compass успешно ја комбинира практичноста на семеен SUV со компактност доволна за секојдневна градска употреба Палетата на бои е инспирирана од природни пејсажи со имиња кои сами по себе раскажуваат приказна за местата каде што овој модел може да ве однесе, во нашиот случај „Hawaii“ зеленатата нијанса во комбинација со црн кров привлекуваше огромно внимани каде и да се појавевме.

Кабина која зрачи со цврстина и зрелост

Со влегувањето во новиот Compass сфаќате дека кабината е целосно ново доживање.  Марката Jeep очигледно вложила сериозен труд за целосно да го подигне впечатокот на квалитет и технологија, а резултатот е опкружување кое сега делува далеку помодерно и позрело од порано. Арматурната табла добива целосно нова архитектура со хоризонтално поставени линии кои визуелно внесуваат чувство на простор и чист дизајн. Се изгледа многу поуредно, а генералниот впечаток е дека е направен сериозен чекор кон повисокиот сегмент.

Во центарот на кабината доминира новиот 16 инчен мултимедијален екран, кој веднаш привлекува внимание. Интерфејсот работи брзо, графиката е современа, а логиката на менијата покажува дека Jeep нуди систем кој може рамноправно да се споредува со конкурентите. Безжичната интеграција со Apple CarPlay и Android Auto е стандардна и функционира беспрекорно. Пред возачот се наоѓа дигитална инструмент табла од 10 инчи, а во тестираниот модел дополнителен елемент претставува Head-Up Display системот, кој најважните информации ги проектира директно во видното поле на возачот. Особено интересно е решението на централната конзола. Наместо класична рачка се користи ротациски контролер за управување со автоматскиот менувач, што веднаш внесува чувство на модерен и минималистички кокпит. Благодарение на ваквото решение, под самиот менувач е оставен длабок и практичен простор , идеален за одлагање предмети кои секојдневно ги носите со себе.

Веднаш до него е поставен и препознатливиот Selec Terrain контролер, еден од деталите што јасно покажуваат дека и покрај електрификацијата, моделот не се откажува од своето наследство. Преку него возачот има можност да избере различни режими на работа според условите на подлогата, а системот автоматски ги прилагодува реакциите на погонот и електронските асистенции. Позитивно изненадува и фактот дека компанијата не подлегнала на модерниот тренд се да се контролира преку интерфејсот на мултимедијата. Климатизацијата добива посебни физички команди поставени веднаш под централниот дисплеј, што овозможува брзо и интуитивно управување без непотребно тргање на вниманието од патот.

Во поглед на материјалите, квалитетот е на значително високо ниво, што е видливо преку површините на арматурната табла, декоративните панели и прецизните споеви што создава чувство на зрел производ со солидна финална обработка Предните седишта се комфорни и добро профилирани, а високата „џиповска“ позиција зад воланот придонесува за одличната прегледност во сите правци. Иако не е најголем во класата. просторот со кој располага задната клупа е повеќе од доволен за двајца возрасни патници кои нема да имаат забелешки ниту на подолги рути. Неговата практичност доаѓа до израз кога ќе се отвори вратата на багажникот која од погледите во стандардната конфигурација скрива 550 литри корисен простор. Тоа е воедно доволно за транспорт на сите потребни елементи кои на годишен одмор ги носи семејство од четри членови.

Фокус на ефикасност во секојдневна употребливост

Во поглед на двигателите понудата се дели на три работни единици. Моделот може да се добие како благ хибрид, приклучен хибрид или пак како возило кое е сосема елетричено задвижувано, изборот останува на вас! Во нашиов случај под предниот поклопец се наоѓа новиот 1.2 литарски трицилиндарски турбо бензински агрегат со 136 КС кој работи во комбинација со 48 волтен „mild hybrid“ систем. Системската моќност изнесува 145 коњски сили, од кои 28 КС ги произведува електромоторот интегриран во шестстепениот автоматски менувач со двојна спојка кој воедно помага при тргнување, забрзување и движење во град.

Менувачот работи мазно, а електричната поддршка успешно ја елиминира типичната турбо задршка при стартување, правејќи го возилото исклучително пријатно во секојдневно возење. При ниски брзини краткотрајно може да се движи и само со електрична енергија, особено во колона, при паркирање или при бавно маневрирање. Фабрички декларираната просечна потрошувачка е 5,8 литри на 100 километри, но во реални услови бројките се нешто поразлични.

За време на тестот, во градски услови потрошувачката изнесуваше 6,8 литри, на отворен пат трошевме 5,4 литри, додека комбинираниот просек за време на тестирањето изнесуваше околу 6,3 литри на 100 километри, што е само половина литар одстапка од декларираното, респектабилен резултат за СУВ со вакви димензии и тежина од речиси 1.7 тони. Во склоп со останатите параметри доаѓа и забрзувањето од 0 до 100 км/ч кое трае 10,3 секунди, а максималната брзина достигнува 188 км/ч. Кога говориме за суспензијата мора да нагласиме дека е поставена со јасен фокус кон комфорот.

На предиот дел се користи „McPherson“ конфигурација, додека задната располага со независна „multilink“ поставеност на оската. Па баш затоа, на „традиционално“ оштетениот градски асфалт и лежечки полицајци Compass се однесува стабилно и уверливо. Нерамнините ги апсорбира без поголем проблем, а кабината останува добро изолирана дури и при повисоки брзини. Во свиоци се чувствува дека инженерите не го бркале „оној“ спортски карактер. Управувањето е лесно и доволно прецизно, но Compass многу повеќе сака релаксирано и комфорно возење отколку динамика. На отворен пат, остава впечаток на стабилен и сигурен придружник, а како што рековме и предходно високата позиција зад управувачот дополнително го засилува чувството на контрола врз патот.

Новиот Compass е пример како еден бренд може успешно да влезе во сегментот каде електрификацијата игра голема улога без притоа да го изгуби својот препознатлив карактер. Не се обидува да биде најспортскиот преставник во класата, ниту најпространиот, но нуди нешто што се потешко се среќава во автомобилската индустрија, а тоа е силен идентитет и чувство дека не управувате со „само“ уште еден кросовер.

Технички податоци за Jeep Compass 1.2 MHEV AT Altitude

Цена на тестираниот модел: 46.600 евра

Jeep Compass во Македонија

Повеќе информации во Аутомобиле Ск на тел. (02) 30 93 100 или на www.jeep.mk

Конкуренти:

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е ДНА КОМУНИКАЦИИ.