Lamborghini го врати Tricolore по 15 години со новиот Temerario

По пауза од 15 години, Lamborghini повторно ја оживеа ознаката Tricolore, претставувајќи го ексклузивниот Temerario Tricolore. Новиот модел беше премиерно прикажан за време на Monterey Car Week, а претставува единствен примерок создаден како омаж на италијанската традиција, дизајн и инженерство.

Ова е првиот автомобил со ознаката Tricolore по Gallardo LP 550-2 Tricolore, претставен во 2011 година, но новиот Temerario носи значително помоќен хибриден погон и современи технологии.

Единствен дизајн инспириран од италијанското знаме

Проектот е реализиран во соработка помеѓу Lamborghini Centro Stile и одделот Ad Personam, задолжен за персонализација на моделите.

Каросеријата комбинира Blu Marinus Shiny во долниот дел и Bianco Monocerus на горниот, додека покривот, ретровизорите и тркалата се обоени во Glossy Nero Noctis. Контраст дополнително создаваат црвените сопирачки клешти.

Највпечатлив детал е централната лента во зелената, белата и црвената боја на италијанското знаме, по која моделот и го добил името Tricolore. За разлика од Gallardo Tricolore, каде што лентата беше поставена асиметрично, кај Temerario таа се протега по централниот дел на автомобилот.

Ентериер со ексклузивни детали

Lamborghini објави само неколку фотографии од кабината, но познато е дека ентериерот е изведен во Nero Adeкожа со контрастни Rosso Alala шевови.

Во кабината се наоѓаат и специјални Tricolore ознаки на вратите, како и силуета на автомобилот, со што дополнително се нагласува ексклузивноста на овој единствен примерок.

Plug-in хибриден V8 со 920 коњски сили

Под каросеријата се наоѓа истиот plug-in хибриден погон како кај стандардниот Temerario.

Системот комбинира 4,0-литарски V8 битурбо мотор, три електромотори, осумстепен автоматски менувач со двојна спојка и батерија со капацитет од 3,8 kWh.

Комбинираната моќност достигнува 920 коњски сили (907 hp / 677 kW) и 730 Nm вртежен момент.

Благодарение на овие бројки, Lamborghini Temerario Tricolore забрзува од 0 до 100 км/ч за само 2,7 секунди, додека максималната брзина изнесува 343 км/ч.

Речиси двојно помоќен од Gallardo Tricolore

Во споредба со својот претходник, напредокот е огромен. Оригиналниот Gallardo LP 550-2 Tricolore користеше атмосферски 5,2-литарски V10 мотор со 550 КС и 540 Nm вртежен момент, испраќајќи ја силата исклучиво на задните тркала.

Новиот Temerario Tricolore располага со речиси двојно поголема моќност благодарение на напредниот хибриден погон, што го прави еден од најмоќните и најбрзите модели што Lamborghini ги има произведено досега.

Со ова специјално издание, италијанскиот производител не само што ја враќа легендарната ознака Tricolore, туку ја комбинира традицијата со најсовремената хибридна технологија, создавајќи автомобил кој ја слави историјата на брендот и неговата визија за иднината.