Ferrari го прошири GT опсегот со новиот Roma

Ferrari официјално ја претстави својата најнова креација, под името Roma, но компанијата не откри многу детали околу V8 купето.

Во предниот дел забележлива е аеродинамична фасција со ретро решетка, под која се наоѓа изразен сплитер, а светлосните уреди се со уникатен дизајн и хоризонтална лента која има улога на LED дневно светло. Она што исто така го карактеризира овој дел на автомобилот е хаубата која е поставена со изразено стрмен наклон. Движејќи се наназад, дизајнот на Roma станува поагресивен во задниот дел благодарение на црниот заден браник и интегрираните четири издувни цевки.

Во внатрешноста она што ги пречекува возачите е високо технолошката кабина со дигитален инструмент панел и вертикално поставен инфозабавен систем. Дури и совозачот има сопствен инфозабавен систем, но сепак уште не е јасно дали ќе биде стандарден или ќе биде понуден како опција како и кај Portofino.

Како што кажавме, Ferrari задржи голем дел од деталите за себе, но она што го потврдија е дека новиот Roma е погонуван од 3,9 литарскиот турбо V8 мотор кој испорачува моќност од 620 коњски сили и 760 Nm вртежен момент. Единицата е поврзана со истиот осум-степен автоматски менувач со двојна спојка искористен и кај SF90 Stradale.

Ова му овозможува на купето да забрза од 0-100 km/h за само 3,4 секунди и покрај тежината од 1.472 килограми. Забрзувањето до 200 km/h е за време од 9,3 секунди, пред да ја достигне максималната брзина од 320 km/h.

Од Ferrari исто така не објавија никакви информации околу лансирањето на Roma.