Touring Superleggera се пофали со Aero 3

Рефлектирајќи ги аеродинамичките принципи на Карло Феличе Бјанки Андрлони, синот на коосновачот и долгогодишен предводник на компанијата со децении, Aero 3 е инспириран од авантгардните дизајни кои потекнуваат од сопствениот ветерен тунел на Touring Superleggera.

Автомобилот ќе биде произведен во само 15 примероци, од кои три веќе се продадени, а Aero 3 ги комбинира аеродинамичниот италијански стајлинг со автентичната рачна изработка и перформансите на V12 суперавтомобил.

Моделот кој ќе дебитира на Salon Privé Concours d’Elégance на 23 септември се одликува со впечатлива Stratosphere црвена боја. Главна карактеристика на надворешниот дизајн е вертикалната перка која всушност нема никаква аеродинамичка функција и е единствено стилски додаток. Дизајнот е инспириран од Alfa Romeo автомобилите дизајнирани од Touring Superleggera во 30-тите години на минатиот век, како и други дизајни на компанијата.

Stratosphere црвената боја се преточува и во внатрешноста во контраст на црните меки елементи од ентериерот, заедно со детали од алуминиум, црн мат алуминиум и мат карбон додатоци. Кабината е обложена во Foglizzo кожа и Алкантара.

Touring Superleggera вели дека Aero 3 е базиран на „истакнат италијански суперавтомобил“, а со оглед на спецификациите на моторот, јасно е дека производителот на каросерии мисли на Ferrari F12 Berlinetta. Aero 3 се напојува со 6,3-литарски V12 мотор кој испорачува 730 КС и 689 Nm максимален вртежен момент. Моторот доаѓа во комбинација со седумстепен секвенцијален менувач со лопатки за менување на брзини и автоматски режим. Благодарение на оваа поставка, автомобилот од нула до „стотка“ стигнува за 3,1 секунда, а максималната брзина е 339 километри на час.

Aero 3 тежи само 1.641 килограм, односно 150 килограми полесен од Ferrari F12 Berlinetta, a тоа е благодарение на фактот дека целата каросерија е изработена од карбон.