Cadillac InnerSpace е елегантен концепт за автономно возило

Откако минатата година ги претстави концептите PersonalSpace и SocialSpace, Cadillac продолжува со своите замисли за иднината на мобилноста со InnerSpace кој го опишува како електрично и автономно луксузно возило наменето за двајца патници. Создаден да привлече внимание, Inner Space концептот е футуристичко купе кое влече инспирација од минатото на Cadillac со оглед на тоа дека станува збор за компактен и личен автомобил за две лица.

Компанијата не откри премногу детали, но концептот се одликува со целосно затворена и осветлена решетка која е обиколена од вертикални светлечки единици. Меѓу останатите впечатливи карактеристики тука се дигиталните ретровизори, масивните тркала и опаѓачката покривна линија. Концептот исто така е опремен со специјално развиени Goodyear пневматици направени од природни материјали како масло од соино зрно и силициум на база на лушпа од ориз. Пневматиците исто така имаат SoundComfort и SightLine технологии, кои испорачуваат важни информации околу притисокот, температурата, товарот и други перформансни фактори.

Ентериер наменет за уживање

И додека екстериерот е дефинитивно атрактивен, кај InnerSpace, како што сугерира и самото име, фокусот е ставен на ентериерот. Како што велат од Cadillac, целосно автономната возачка технологија им овозможува на патниците да се фокусираат на своето патување наместо на возењето. Патувањето е замислено да биде опуштено бидејќи концептот се одликува со предни седишта кои повеќе наликуваат на фотелји и имаат потпирачи за нозете. Тука е и „претопувачкиот и панорамски SMD LED екран“ кој овозможува „пристап до проширена реалност, забава и велнес тематика“.

Од Cadillac не дадоа објаснување, но концептот исто така има и екрани во вратите, а InnerSpace исто така добива и луксузен простор за складирање, лебдечки потпирачи за глава и осветлени акценти насекаде во кабината.

Иако не се познати спецификациите, моделот ја користи Ultium платформата, а благодарение на нејзиниот бежичен систем за менаџирање на батеријата, успеале да ги прошират батериските модули низ целото возило со цел да се максимизира пространоста. Оваа флексибилност го овозможува и елегантниот стајлинг, како и ниската седечка поставеност.