Lexus ES добива низа освежувања за 2023 година
Lexus ги поднови ентериерот и технологијата кај европската верзија на ES, одржувајќи го седанот ажуриран за моделската 2023 година
Lexus најави серија унапредувања за седанот ES во Европа, вклучувајќи нов инфозабавен систем, повеќе технолошки карактеристики и ново ниво на опременост F Sport Design.
Шестата генерација на Lexus ES беше претставена во 2018 година и доби освежување во 2021 година. Меѓутоа, оттогаш работите продолжија да се менуваат на технолошки план, при што Lexus го промовираше својот најнов систем за информации и забава во моделите како RX, NX и UX. Така, европскиот ES сега ќе ја користи побрзата единица која е полесна за употреба и има повеќе функции.
Lexus не ја откри големината на централниот екран на допир, но веројатно е 12,3 инчи како и кај другите модели во неговата постава. Системот носи безжична Apple CarPlay конекција, додека за Android Auto сè уште е потребна жична врска. Има и „клауд“ навигација што прикажува ажурирани информации во реално време за сообраќајот, цените на горивото и паркирањето. Системот за препознавање глас исто така е обновен, компатибилен со 19 различни европски јазици, а одгоара и на неформални команди.
Новиот модул за комуникација со податоци (DCM1) му овозможува на ES да се поврзе со мобилни мрежи и интернет, како и да ја интегрира функцијата e-Care која го надгледува возилото 24/7 и го известува сопственикот кога е потребна услуга. Модулот исто така дава пристап до функциите за далечинско управување преку апликацијата за паметни телефони Lexus Link.
Промени во ентериерот
Оставајќи ја настрана новата инфозабава, Lexus ја редизајнираше централната конзола на ES. Сега има два држачи за чаши, USB-A и USB-C портови, плус нова подлога за безжично полнење што е полесно достапна. Последно, новата опција за украсување на ентериерот Ammonite Sand го замени Rich Cream.
Нема надворешни промени на ES со оглед на тоа дека моделот неодамна беше фејслифтиран. Сепак, Lexus сега го нуди нивото на опременост F Sport Design, кое се одликува со црно обоени 19-инчни алуминиумски тркала и значки F Sport Design на крилата, додека нуди избор помеѓу 10 бои за надворешноста и четири внатрешни бои. Опциите за погон остануваат исти, но варијантата ES 300h ќе биде достапна на дополнителни пазари.
Производството на Lexus ES за 2023 година ќе започне во август, а првите испораки се закажани за октомври.
