Тест MG EHS: Новитет со сериозни намери

Спортско – елегантниот дизајн на екстериерот, максимално конфорниот ентериер со изненадувачки добра завршна обработка и високотехнолошкиот хибриден систем му овозможуваат на моделот EHS Plug-in Hybrid да се позиционира како сериозен предизвикувач во екстремно популарниот сегмент на SUV возила во кој досега главниот збор го имаа јапонските, корејските и западно-европските преставници.   

Во светот на автомобилите, марката MG (Morris Garages) зазема посебно место, основана во 1924 година во Велика Британија од Вилијам Морис, пионер на автомобилизмот и сопственик на тогашната компанија, Повеќе од 90 години од основањето, ДНК-то на MG Motor ги обединува сите врвни перформанси кои ја направија компанијата успешна во минатото.

Специфичните карактеристики што доаѓаат со традицијата се препознатливи и опипливи и денес кај новите генерации на автомобили на MG, каде што спојот на наследството и високата технологија инспирира страст за возење и слобода на патот, истовремено обезбедувајќи удобност и максимална безбедност. „Создавањето нова ера на автомобили“, како што официјално го нарекуваат во MG Motor, значи дека компанијата користи нови технологии за да ги подобри своите модели кои се дефинираат како автомобили на иднината, погодни за секојдневните потреби и навики на современите возачи и урбаните млади семејства.

Елеганција со спортски призвук

Пред неколку месеци на регионалната презентација подготвена за специјализираните автомобилски новинар од „Адриатик регионот“ имавме прилика на кратко да се запознаеме со сите модел на MG кои ќе бидат достапни на нашиот пазар. Првиот од низата со кој поминавме неколку дена на домашно тло е моделот MG EHS кој доаѓа исклучиво како Plug-in Hybrid што настапува во сериозно популарниот С-сегмент. Нговата надворешноста се истакнува со искрени пропорции и хармоничен дизајн, моделот е дизајниран да изгледа наменски и спортски, со цел совршено да ги задоволи барањата на клиентите од стариот континент.

На предната страна вниманието го привлекува најновата итерација на отворот на ладилникот, или како што во компанијата ја нарекуваат „ѕвездена мрежа“ во која е врамено најголемото лого на MG досега. Прoфилот одсликува автомобил со течни линии што се претвораат во мускулеста маса како се доближуваат кон задниот дел, каде што пак главниот збор го има големиот спојлер зад задното стакло, и големите светлосни склопови кои длабоко навлегуваат во страните на возилото. На долниот дел се двете „вистински“ издувни цевки, по една од секоја страна кои го дополнуваат елегантниот и спортски изглед. Дизајнот се базира на постулатите кои се моментално во тренд, а се поставени од теренците, целосно пријатен и ненаметлив пакет на кој секојдневно ќе пронаоѓате нови и интересни детали.

Високо ниво на софистицираност

Во внатрешноста доминираат материјали кои се меки на допир, бидејќи дизајнерите во прв план ја ставиле удобноста и квалитетот за да ја направат кабината многу привлечно и посакувано место за престој. Добрата ергономија на возачката позицијата и пространите седишта ја прават внатрешноста на моделот EHS пријатен простор за поминување на квалитетни семејни моменти. Како на предните, така и на задните седишта во однос на комодитетот, овој модел нуди габарити и удобност за кои сметаме дека се меѓу водечките во класата. Покрај тоа, во просторот предвиден за багаж може да се сместат предмети до максимални 448 литри кога задните седишта се во функција или 1.375 литри кога истите се соборени.

Моделот EHS Plug-in Hybrid е изграден со цел да одговара на животниот стил и потребите на едно модерно семејство. Поради тоа, богатото ниво на опременост и обемниот систем за помош на возачот, наречен MG Pilot доаѓаат како стандард. Мултимедијалниот екран со големина од 10,1-инчен се поврзува со системите на Apple CarPlay и Android Auto апликациите, а пред возачот функциите се прикажани на 12,3-инчни дигитални инструменти. Како составен дел доаѓа и панорамски покрив со дарежливи пропорции, како и камера со опсег од 360 степени за максимална видливост при паркирање. На крајот ќе дополниме дека моделот EHS Plug-in Hybrid освои пет ѕвезди на Euro NCAP тестот што го става во групата на максимално безбедни возила.

Мазно комбинирање за оптимални резултати

Тестираниот модел, MG EHS Plug-in Hybrid е придвижуван од 1,5-литарски турбо мотор со 162 КС кој е помогнат од електро мотор што располага со 120 КС (90 kW), а заедничката моќност од двата системи по комплицираниот процес на собирање еднаква на 258 КС се испраќа кон предната оска. Со комбинираната моќност и моменталниот одговор на електричниот мотор, MG EHS забрзува од 0 до 100 km/h за 6,9 секунди, што е резултат за пофалба ако се земе во предвид дека неговата тежина изнесува речиси 1,8 тони.

Официјалните бројки велат дека MG EHS обезбедува импресивна економичност и ниски емисии на CO2 од само 43 g/km и просечна потрошувачка од неверојатни 1,8 л/100 км. Што во реалност изнесува окулу 6,5 литри на секои 100 изминати километри. Затоа пак, кога е вклучен само електричниот мотор и батеријата од 16,6 kWh е во целост полна (се полни од 0 до 100% за 4 часа), обезбеден е опсег од 52 километри според производителот, а ние успеавме да поминеме 45 километри, што не е толку далеку од декларираниот податок, а воедно е сосема доволно да се покрие просечното дневно патување. Она што помага да се постигнат овие перформанси и економичност е десетстепениот автоматски менувач.

Моќта од бензинскиот мотор се канализира преку шест-брзински автоматски менувач, додека електромоторот ја пренесува силата преку електронски погон со четири брзини. Заедно тие обезбедуваат десет електронски контролирани преносни односи кои секогаш ја постигнуваат оптималната комбинација на брзини, одржувајќи ги емисиите што е можно пониски, а уживањето и перформансите на највисоко ниво.

Накратко, моделот MG EHS Plug-in Hybrid им овозможува на возачите кои се уште не се подготвени за целосно електричен автомобил да возат електрично и одржливо без да се грижат дека ќе останат на половина пат од целта. Во прилог оди податокот дека сите модели на MG без разлика дали се погонувани од бензински или хибриден погон доаѓаат со една од водечките гаранции на пазарот, која изнесува 7 години и 150.000 км. Истата ќе важи и за моделите со електричен погон и батерија, кои патем се очекува да се појават во Македонија со почетокот на следната година.

Цена на тестираниот модел 42.900 евра

Технички карактеристики за MG EHS Plug-in Hybrid Luxury

Повеќе информации во Мида Гранд Моторс  Бул. „Босна и Херцеговина“ бр.1, Скопје (02 307 3103) или
на www.mgmotor.mk

MG EHS Plug-in Hybrid Luxury во Македонија

Конкуренти:

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.