Citroen C4 и C4 X отсега достапни и со благ хибриден погон
Hybrid 136 погонската единица носи 20% подобрување во ефикасноста на горивото во споредба со неелектрифицираниот погон кај C4 и C4 X
Stellantis ја проширува имплементацијата на благата хибридна технологија на дополнителни постоечки модели. Citroen C4 и C4 X се најновите што ја добија оваа надградба, воведувајќи нова „Hybrid 136“ верзија во понудата.
Новиот благо електрифициран турбо погон од 1,2 литри со три цилиндри е еволуција на познатиот 1.2 PureTech, иако Stellantis тврди дека 40 проценти од неговите делови се нови. Мал синхрон електричен мотор со постојан магнет е интегриран во куќиштето на новиот шестстепен автоматски менувач (e-DCS6), заедно со инвертерот и ECU. Енергијата се добива од 48V литиум-јонска батерија со капацитет од 432 Wh која е поставена под возачкото седиште и се полни преку регенеративно сопирање.
Електричниот мотор произведува до 29 КС и 55 Nm, но може да придонесе само 12 КС во забрзувањето. Од друга страна, 1.2 PureTech испорачува за 136 КС и 230 Nm. И покрај тоа што ова е благ хибриден систем, Citroen тврди дека C4 и C4 X можат да возат во електричен режим до 50% од времето во урбаните области. Како резултат на тоа, тие согоруваат 20 проценти помалку гориво во споредба со неелектрифицираните верзии, додека испуштаат 20 проценти помалку CO2.
C4 и C4 X беа претставени во 2020 и 2022 година и не добиваат никакви визуелни надградби. Ова е првпат да им се вгради блага хибридна 48V технологија, проширувајќи ја погонската група до постоечките бензински, дизел и целосно електрични опции. Според францускиот производител, електричните верзии сочинуваат 25 отсто од продажбата на C4 и 35 отсто од продажбата на C4 X во Европа, што покажува дека купувачите се љубители на електрификацијата – барем во однос на овој конкретен модел.
Новите верзии на С4 и C4 X се веќе достапни за нарачка, а првите испораки се очекуваат во пролетта 2024 година. Citroen С4 Hybrid 136 стартува од 33.200 евра, додека цената е 33.900 евра за еквивалентниот С4 X.
