Fiat TRIS е електричен трицикл наменет за урбана логистика

Fiat, познат по своите мали градски автомобили како Panda и 500, отвора ново поглавје со целосно електричниот модел TRIS – трициклусно лесно комерцијално возило наменето за последна милја достава. Новитетот е дизајниран во дизајнерскиот центар Centro Stile во Торино и е претставен како „достапно ултра-лесно комерцијално возило“. Прво ќе се продава на пазарите во Африка и Блискиот Исток, но не е исклучена можноста наскоро да пристигне и во Европа.

Компактен, агилен и практичен

Fiat TRIS е долг само 3,17 метри, но се нуди во три конфигурации: шасија-кабина, рамна платформа и пикап. Сите верзии користат исто подвозје со препознатлив преден дел и LED светла во форма на стрела. Возилото е обоено во двобојна схема, што му дава модерен изглед, без да ја жртвува утилитарната функционалност.

Кабината е фокусирана на практичност и ергономија. Возачот располага со 5,7-инчен дигитален екран, USB-C приклучок, простор за одлагање, и седиште дизајнирано за долги работни часови. Недостигот на врати овозможува лесно влегување и излегување при чести достава. TRIS доаѓа и со три-точковен безбедносен појас, предни LED светла, звучен сигнал за движење наназад и резервоар за течност за чистач – сите елементи што ги исполнуваат европските хомологациски стандарди.

Импресивна носивост за својата класа

Иако е мало по димензии, Fiat TRIS нуди товарен простор од 2,25 м² и носивост до 540 килограми. Вкупната маса на возилото (GVW) изнесува само 1.025 кг. Електричниот мотор со 48 волти испорачува 12 КС и 45 Nm вртежен момент, додека батеријата со капацитет од 6,9 kWh (истата како кај Fiat Topolino) обезбедува домет до 90 километри според WMTC циклус. Полнењето се врши преку обичен 220V приклучок и трае околу 4 часа и 40 минути.

За стабилноста се грижат 12-инчните тркала, проширената задна трага и продолжената меѓуоскина растојание. И покрај лесната конструкција, шасијата и рамката изработени од цевчеста структура ветуваат цврстина споредлива со патнички автомобили, со дополнителна заштита од корозија благодарение на оцинкувана облога.

Производство, достапност и иднина во Европа

Fiat TRIS се произведува во Мароко, заедно со други микро-електрични модели на Stellantis групацијата како Citroen Ami, Fiat Topolino и Opel Rocks Electric. Цената сè уште не е објавена, но се очекува да биде пристапна и во духот на брендот.

Извршниот директор на Fiat, Оливие Франсоа, изјави:
„Со дебито во Блискиот Исток и Африка, TRIS има потенцијал да ја трансформира урбаната мобилност и да донесе економска инклузија. Веруваме дека неговиот потенцијал е глобален – Европа е следна, бидејќи ова е паметно и одржливо решение кое зборува универзален јазик.“

Fiat TRIS ја најавува новата ера на урбани, компактни и ефикасни возила за достава, и е силен играч во електрификацијата на лесниот комерцијален сегмент.