Ford Transit Connect уште поефикасен

Главните акценти кај моделот се поврзани со интеграцијата на нов дизел мотор, оптимизиран бензински, како и неколку нови варијанти во однос на менувачките кутии, кои ветуваат подобрување во горивната економичност и CO2 емисиите до 12%. Новиот Transit Connect, кој е дел од четиричленото семејство Transit на Ford, за кој компанијата потенцира за реализирани вкупно 126.000 продажби на основните европски пазари во првите 5 месеци од годинава, веќе доаѓа со целосно нов 1.5 литарски EcoBlue дизел мотор.

Погонскиот агрегат е достапен во три верзии според моќноста 75, 100 и 120 коњски сили, а просечната потрошувачка се движи од 4,7 до 5,0 литри на 100 километри. За оние корисници кои се фокусираат на бензинот како енергетски извор, од Ford е предвидена нова модификација со оптимизирана верзија 1.0 литарскиот трицилиндерски EcoBoost мотор, кој доаѓа со функција за моментално деактивирање на работен цилиндар и постигнување на просечна потрошувачка на гориво од 6,4 литри на 100 километри.

Друга новина во модификационното портфолио на Ford Transit Connect е воведувањето на шест-брзински мануелен менувач како стандардна опрема за сите верзии, како и целосно нова осумстепена автоматска трансмисија, како опција, при модификациите 1.5 EcoBlue во варијанти 100 и 120 коњски сили. Новата автоматска кутија доаѓа со неколку интересни функционалности, вклучувајќи и адаптивно префрлување во зависност од стилот на управување, како и препознавање на наклон на спуст или искачување за оптимизирана работа.

Дополнителна заштеда на гориво кај Ford Transit Connect е постигната преку оптимизирање на аеродинамиката на возилото, воведувањето на ECO режим на работа и други поединости.