Honda го покажа новиот CBR1000RR-R Fireblade

Honda официјално ја претстави новата CBR1000RR-R Fireblade за моделската 2027 година, суперспортски мотоцикл кој е развиван со јасна цел – да биде уште побрз на тркачка патека, без притоа да ја загуби практичноста за секојдневно возење на јавните патишта.

Развојот започнал заедно со WorldSBK тимот на Honda, каде најпрво биле дефинирани барањата за тркачката верзија, а потоа тие решенија биле пренесени и кај серискиот модел. Инженерите се фокусирале на подобро влегување во свиоци, поголема брзина низ нив, подобро забрзување при излез и намалување на тежината.

Нова шасија и подобра распределба на тежината

Новата Fireblade тежи 199 килограми со полн резервоар, а распределбата на тежината е дополнително подобрена. Предниот дел сега носи 53,3 проценти од вкупната тежина, во споредба со 52,8 проценти кај претходната генерација, што придонесува за попрецизно управување.

Редизајнираната алуминиумска рамка има 20 проценти помала странична крутост, додека алуминиумската задница (swingarm) е пократка за подобра тракција при забрзување. Долната точка на прицврстување на задниот Showa BFRC-Lite амортизер е преместена од рамката директно на моторот, решение кое дополнително ја подобрува стабилноста.

Напред е поставена целосно прилагодлива 43-милиметарска Showa BPF USD вилушка, а и предната и задната суспензија овозможуваат комплетни поставки според стилот на возење.

MotoGP аеродинамика без класични крилца

Honda применува искуство стекнато во MotoGP и кај новата Fireblade. Целосно редизајнираната аеродинамика повеќе не користи класични крилца, но благодарение на новите странични аеродинамични елементи во долниот дел од оклопот го задржува истото ниво на потисна сила, со помал отпор на воздухот.

Познати 217 КС, но со повеќе сила таму каде што е најпотребна

Под оклопот останува добро познатиот четирицилиндричен мотор со краток од, кој испорачува 217 КС (160 kW).

Најголемите промени се направени кај испораката на силата. Максималниот вртежен момент од 114 Nm сега е достапен при 10.500 вртежи во минута, што е дури 1.500 вртежи порано во споредба со моделот од 2024 година. За ова придонесуваат и новите варијабилни усисни канали, кои овозможуваат посилно повлекување во средниот опсег на вртежи.

Напредна електроника со шестосна IMU платформа

Електронскиот пакет е базиран на 6-осна IMU единица, која управува со сите системи за асистенција.

Возачот располага со три однапред поставени, но целосно прилагодливи Riding Mode режими, HSTC контрола на пролизгување со девет нивоа на подесување, како и Launch Control систем за максимално ефикасно забрзување од место.

Две уште поекстремни верзии

Покрај стандардниот модел, Honda ќе ги понуди и Fireblade SP и Fireblade HRC Works Edition.

Верзијата SP добива Öhlins S-EC 3.0 полуактивна електронска суспензија и нови Brembo Hypure сопирачки со уште подобри перформанси.

На самиот врв е Fireblade HRC Works Edition, верзија наменета пред сè за користење на тркачка патека. Таа располага со можност за прилагодување на аголот на управувачката глава и позицијата на задната вилушка, механичка Öhlins NPX28-30 предна вилушка, TTX36 заден амортизер и Brembo Hypure Sports сопирачки. Моделот ќе биде достапен во препознатливата Ignition Red боја со едносед конфигурација.

Со бројните механички, аеродинамични и електронски подобрувања, Honda CBR1000RR-R Fireblade 2027претставува значајна еволуција на јапонскиот суперспортски модел, насочена кон уште побрзи кругови на патеката, но и подобро искуство при возење на отворен пат.