Историски пресврт во ЕУ: За првпат продадени повеќе ЕВ отколку бензинци

И покрај честите тврдења дека пазарот на електрични возила забавува, најновите податоци за 2025 година покажуваат поинаква слика. Глобалната побарувачка за електрични автомобили порасна за 20 проценти, а Европската унија забележа историски момент – во декември за првпат беше продаден поголем број целосно електрични отколку бензински автомобили.

Глобален раст и покрај скепсата

Според студијата на институтот Benchmark Mineral Intelligence, во текот на 2025 година ширум светот биле продадени вкупно 20,7 милиони возила без штетни емисии, што претставува раст од 20 проценти на годишно ниво. Позитивен тренд е забележан во речиси сите региони во светот, со исклучок на Северна Америка, каде растот е значително послаб.

Овие бројки доаѓаат во период кога дел од медиумите и аналитичарите предупредуваа на стагнација и нереализирани прогнози за електричната мобилност, но податоците покажуваат дека транзицијата продолжува со стабилно темпо.

Кина останува глобален лидер

Како што пренесува Autonet.hr, Кина и натаму е апсолутен лидер во сегментот на електрични возила. Во 2025 година таму биле продадени 12,9 милиони електрични автомобили, што е раст од 17 проценти во споредба со претходната година. Со тоа, Кина учествува со повеќе од половина од вкупната светска продажба на електрични возила и останува главниот двигател на глобалната електрификација на транспортот.

Пресврт во Европската унија

Податоците на Европската асоцијација на производители на автомобили (ACEA) укажуваат на клучна пресвртница на европскиот пазар. Во декември 2025 година, во 27-те земји членки на ЕУ, продажбата на електрични автомобили со батерии првпат ја надмина продажбата на бензински возила.

Во последниот месец од годината, уделот на бензинските автомобили изнесувал 22,5 проценти, додека електричните модели достигнале 22,6 проценти. Најголем удел и понатаму имаат благите хибриди со 33,7 проценти, додека plug-in хибридите учествувале со 10,7 проценти од продажбата.

Електричните возила сè посилни на годишно ниво

Гледано на ниво на целата година, во Европската унија биле регистрирани 1,88 милиони нови електрични автомобили, со што овој сегмент освоил 17,4 проценти од пазарот. Истовремено, бензинските и дизел моторите бележат сериозен пад.

Нивниот заеднички пазарен удел се намалил на 35,5 проценти, во споредба со 45,2 проценти во 2024 година. Особено изразен е падот кај бензинските возила, чии регистрации се намалиле за 18,7 проценти, со најголеми загуби во Франција и Германија.

Германија води, но пазарот сè уште не е целосно закрепнат

Четирите најголеми пазари во ЕУ – Германија, Холандија, Белгија и Франција – кои заедно сочинуваат 62 проценти од сите регистрации на електрични возила, забележале позитивен тренд. Германија е на чело со раст од 43,2 проценти, додека останатите три земји исто така бележат двоцифрен раст.

Сепак, ACEA предупредува дека вкупниот обем на продажба на сите типови возила сè уште е под нивото од пред пандемијата, што укажува на потребата од понатамошен развој на инфраструктурата и стабилизација на пазарот.

Volkswagen води, Tesla со најголем пад

Кога станува збор за производителите, лидерската позиција ја задржува Volkswagen групацијата со раст од 5,5 проценти. Следуваат Stellantis, кој бележи пад од 4,7 проценти, и Renault групацијата со раст од 5,6 проценти.

Најголемиот индивидуален пад на продажбата го има Tesla, со минус од 37,9 проценти. И покрај тоа, Model Y и Model 3 остануваат меѓу најпродаваните електрични автомобили во Европа, заземајќи го првото и третото место на листата.