Italdesign го оживува култниот DeLorean како електричен автомобил

Италијанската компанија Italdesign во соработка со брендот DeLorean најави оживување на култниот автомобил под името DeLorean EVolved со објавување на тизер видео претходно во февруари, а сега е потврдено дека новиот модел ќе дебитира во август за време на Pebble Beach Concours d’Elegance.

Italdesign не објави нови визуелни детали за новиот модел, но италијанската дизајнерска компанија потврди дека автомобилот ќе биде целосно електричен. Покрај ова, ќе се одликува со карактеристичните „ламбо“ врати што во комбинација на препознатливиот стајлинг на Italdesign ќе придонесе за модерна верзија на легендарниот DMC-12 од раните 80-ти години на минатиот век. Покрај тоа што ќе биде целосно електричен автомобил, сериозен фокус ќе биде ставен и на луксузот, а ќе го произведува DeLorean Motor Company. Засега нема детали околу цената и достапноста, но сосема извесно е дека ќе биде модел во ограничена серија.

Italdesign развива нова платформа со Williams Advanced Engineering

Тизерот кој го објавија двете компании не открива премногу, но ја покажува динамичната силуета со препознатливите врати, извајаната хауба и осветлен V амблем на предницата. Инаку, и самото тоа што Italdesign е дел од проектот, се вклопува во наследството на легендарниот автомобил, со оглед на тоа дека и оригиналниот DMC-12 беше дизајниран од страна на Џорџето Џуџаро, иако основачот на Italdesign повеќе не е дел од компанијата.

Минатата година, Italdesign започна партнерство со Williams Advanced Engineering за развојот на EVX модуларната платформа која делува идеално за високоперформансни GT автомобили. Оваа архитектура наменета за електрични автомобили може да испорача системска моќност од 1.360 КС и максимален опсег на движење од 1.000 километри.

„Со DeLorean, ние работиме на автомобил кој има автентична експресија на сите услуги по кои Italdesign е познат на меѓународно ниво. Почнувајќи од стајлингот, со оглед на тоа дека ние сме официјален партнер“, изјави Андреа Порта, менаџерот за бизнис развој на Italdesign. „Возбудени сме што следната еволуција на DeLorean брендот ќе биде претставен преку нашето партнерство со Italdesign“, изјави Трој Битз, дел од раководниот тим на DeLorean.