Jeep ја забрзува електрификацијата со електричниот Avenger

Jeep ги засилува своите планови за целосна електрификација на брендот со најавата за четири нови електрични возила, од кои првиот е SUV Avenger кој ќе започне да се продава во Европа следната година.

Малиот електричен теренец е едно од првите возила што ќе имаат корист од новата STLA архитектура на Stellantis и ќе биде целосно претставен на Саемот за автомобили во Париз во октомври. Покрај Avenger кој ќе се нуди исклучиво во Европа, Jeep ќе понуди уште три електрични модели, вклучително и хардкор теренецот наречен Recon, целосно електричен Wagoneer S и уште еден електричен SUV.

Jeep се обврза 50 отсто од автомобилите што ги продава во Америка да бидат електрифицирани до 2030 година, но во Европа таа бројка изнесува 100 отсто, односно планот е марката да стане целосно електрична, а Avenger е клучен за компанијата да ја достигне таа цел. За прв пат прикажан на презентацијата на Stellantis Dare Forward на долгорочниот план на групацијата претходно оваа година, Avenger ќе се произведува во Tychy, Полска, заедно со сè уште тајните теренци на Alfa Romeo и Fiat, и ќе влезе во европската гама на Jeep каде ќе се позиционира под Renegade.

Иако е замислен како урбан автомобил, а не како класичен теренец, Avenger ветува „импресивно“ растојание од подлогата и агли на пробивање, плус електричен опсег на возење од 400 километри. Jeep вели дека неговиот најмал SUV ќе испорача модерен ентериер, со сета технологија што ја очекуваат купувачите и голем простор за луѓе и товар.

Avenger ќе има и хибридна верзија

Autocar известува дека Avenger ќе биде достапен во верзии со погон на две или на сите тркала во зависност од тоа дали клиентите ќе изберат еден електричен мотор со 95 КС или два исти (по еден на секоја оска), а истакнуваат дека ќе биде достапна и хибридна верзија. Иако хибридната верзија треба да изгледа речиси идентично со ЕВ верзијата, таа всушност ќе биде изградена на постарата Stellantis CMP платформа што ја користат автомобили како DS 3 Crossback.

„Целосно новиот Avenger ќе понуди способност за брендот Jeep што е овластена за европскиот пазар“, рече Антонела Бруно, шеф на Jeep Europe во Stellantis. „Овој модерен, забавен и емоционален SUV ќе ги привлече се поголемиот број клиенти кои се во потрага по способна, компактна, модерна и целосно електрична алтернатива од брендот Jeep“.

Jeep не откри колкава ќе биде цената на Avenger, но европските купувачи ќе можат да го нарачаат својот примерок од 17 октомври, кога автомобилот ќе биде целосно претставен во Париз.