Lada Niva доби нова Sport варијанта
Најновата верзија на прославениот теренец со ознаката Niva Sport влезе во производство, со голем број стилски и механички надградби
Lada Niva, автомобилската легенда која дебитираше во 1977 година, продолжува да се трансформира, овој пат со нова верзија наречена Niva Sport. Со нов мотор и неколку спортски додатоци, AvtoVAZ се обидува да ѝ даде свежина на оваа класика, иако спортскиот дух никогаш и не бил поврзуван со целта на овој легендарен автомобил.
Подобрени перформанси
Главната новост кај Niva Sport е новиот надолжно поставен 16-вентилен четирицилиндерски мотор со 124 КС и 151 Nm вртежен момент. Ова е значителен напредок во споредба со стандардниот 1.7-литарски бензински мотор кој произведува 83 КС и 129 Nm.
Новата моќност е комбинирана со надграден петстепен мануелен менувач со засилена петта брзина, робусно куќиште за спојката и единечно куќиште за трансфер. Системот за постојан погон на четири тркала (4WD) обезбедува стабилност на сите терени.
Дополнително, Lada воведе „спортски подесувања за суспензијата и сопирачките,“ кои, според производителот, го подобруваат динамичното возење во споредба со останатите модели во серијата.
Дизајн со спортски детали
Кога станува збор за екстериерот, новиот изглед на Niva Sport, меѓу другото вклучува црвен „Sport“ амблем на пластичната решетка кој треба да го разликува од стандардната верзија. Потоа, тука се новите 16-инчни алуминиумски тркала, широките продолжетоци на калниците, дополнителни LED светла на предниот дел како и отвор на хаубата
Интересно е што Niva Sport не ги доби обоените браници од Urban и Black верзиите, ниту агресивниот дизајн на решетката и светлата од Bronto, кои ќе го надополнеа спортскиот изглед.
Внатрешноста на Niva Sport е украсена со црвени детали, вклучувајќи шевови на воланот, инструмент таблата, рачките за менувачот и рачната сопирачка, како и на седиштата. Од достапните фотографии, се забележува дека возилото има клима-уред, електрични ретровизори и прозорци, но му недостасува аудио систем.
Влијание од рели историјата
Lada вели дека Niva Sport е инспирирана од рели успехот на моделите Niva, вклучувајќи ја и победата на Silk Way Rally Marathon 2024. Иако премиерата на овој модел беше одложувана неколку пати, производството конечно започна.
Lada сè уште не ги открила деталите за пазарното лансирање или цените за Niva Sport, но локалните медиуми шпекулираат дека цената би можела да надмине 2,000,000 рубли (околу 20,000 евра). Тоа би ја направило најскапата верзија на Niva. За споредба, основниот модел Classic започнува од 981,000 рубли (9,800 евра), додека Bronto Prestige чини 1,485,000 рубли (14,800 евра).
Lada Niva Sport можеби не е спортски автомобил во традиционалната смисла, но со своите подобрувања и спортски детали, го одржува духот на еден од најдолговечните теренци на пазарот. Времето ќе покаже дали новиот модел ќе ја освои публиката или ќе остане уште еден експериментален чекор за оваа легенда.
