Mazda го враќа турбо ротацискиот мотор со Vision-X Coupe

Mazda на Саемот за мобилност во Токио го претстави Vision-X Coupe, футуристички четиривратен купе концепт кој го најавува дизајнерскиот и техничкиот правец на брендот за 2035 година. Претседателот на Mazda, Масахиро Моро, го опиша моделот како симбол на нова филозофија во која перформансите, одржливоста и емоцијата се спојуваат во едно.

Еволуција на Kodo дизајнот со чисти и издолжени линии

Иако деталите за дизајнот се намерно ограничени, Vision-X Coupe јасно го развива препознатливиот Kodo јазик на Mazda. Предниот дел е обележан со целосно затворена маска, нагласена со декоративни елементи во форма на „заби“, додека тенките LED светла и широкиот долен отвор создаваат монолитна и аеродинамична форма. Страничната силуета е со чисти панели, без класични рачки и ретровизори, а долгата покривна линија се спушта до задниот дел со компактно багажно капаче и карактеристични задни светла.

Со должина од 5.050 мм, ширина од 1.995 мм и висина од 1.480 мм, Vision-X Coupe е значително поголем од Mazda6, а дури и го надминува по димензии некогашниот Mercedes CLS, модел кој го дефинираше сегментот на „четиривратни купеа“.

Ентериер кој комбинира модернистичка технологија и топлина

Во внатрешноста, Mazda не го следи трендот на доминирачки екрани кои создаваат студен, дигитален амбиент. Наместо тоа, Vision-X Coupe претставува пример како технологијата може да изгледа топло и со душа. Инструмент-таблата е дигитална, но оформена во три кружни „мерни тела“ со ретро-инспириран дизајн, додека дел од информациите е прикажан и на воланот. Централната конзола е широка, а рачката на менувачот има форма инспирирана од бејзбол ракавица. Задниот дел нуди две индивидуални седишта, со двобојни материјали и декоративни панели кои додаваат елеганција.

Плаг-ин хибрид со ротациски мотор и 503 КС

Vision-X Coupe користи плаг-ин хибриден погон, составен од турбо ротациски мотор, електромотор и батериски пакет чиј капацитет Mazda сè уште не го открива. Системската моќност изнесува 503 КС, додека електричниот досег достигнува 160 километри. Со комбинирано возење, автомобилот може да помине до 800 километри пред повторно полнење или точење гориво.

Возило кое ја чисти атмосферата

Најреволуционерната компонента е технологијата за фаќање на CO₂. Mazda користи јаглерод-неутрално гориво добиено од микроалги, кои природно апсорбираат CO₂ додека растат. Маслата од алгите се трансформираат во одржливо гориво, а остатокот од биомасата може да се користи за храна или ѓубриво. Истовремено, автомобилот директно собира дел од сопствените емисии CO₂ од издувниот систем, кои потоа може да се употребат повторно во земјоделството или во производство на напредни карбонски материјали.

Mazda Vision-X Coupe претставува јасна порака дека иднината на автомобилите може да биде моќна, емоционална и еколошки свесна, без компромис во дизајнот и уживањето во возењето.