Новите Sandero и Logan се најпрефинетите модели на Dacia досега

Кога Dacia ја лансираше првата генерација на Logan во 2004, а потоа и Sandero во 2007 година, последната помисла беше префинетоста на моделите. Стануваше збор за високо практични, економични семејни автомобили со фокус на евтино одржување и добра потрошувачка на гориво. Но, денеска јасно се гледа напредокот кој романската марка го направи со своите модели.

На почетокот, базичните модели на Dacia Sandero и Logan немаа ниту клима-уред, ABS и серво, и таков беше случајот со години. Прилично сиромашна опрема дури и за тоа време. Денес сето тоа изгледа многу подобро, поквалитетно, а Dacia го следи и чекорот со дизајнерските трендови во автомобилската индустрија. Едноставно, работите се многу подобри со новата, трета генерација на овие возила.

Целосно новите Sandero, Sandero Stepway и Logan се поставени на новата модуларна CMF платформа која му овозможува на производителот да направи три огромни промени. Првата е акустиката, односно Романците значително се потрудија кабината на новитетот да биде многу подобро звучно изолирана. Така, обрнато е внимание на изолација на моторот, како и струењето на воздухот. Dacia наведува дека вибрациите во кабината се намалени во просек за 3-4 децибели. Понатаму, Logan и Sandero добија подобра возна динамика. Така, овој тандем сега има побрза и подиректна реакција на управувачот, со подобра возна динамика.

Возењето ќе биде поудобно со новитетите, а во согласност со тоа е поставувањето на нешто поцврстиот систем на потпирање, отколку што беше случајот досега. Покрај тоа, новите Logan и Sandero поседуваат и низа модерни, како активни, така и пасивни системи за безбедност, пред се AEB, со кој во моментов не можат да се пофалат ни далеку поскапи модели кои се во продажба во Европа.