Хрватите со конкурент на Tesla Roadster
Хрватскиот производител на супер автомобили, Rimac, планира да создаде електричен модел кој ќе биде директен ривал на втората генерација на Tesla Roadster
![Rimac](https://avtoplus.mk/wp-content/uploads/2017/11/Rimac-1600-1a-780x405.jpg)
Неодамна Илон Маск го покажа новиот Roadster, кој ветува возбудливи искуства зад воланот – максимална брзина над 400 km/h, автономија со едно полнење од речиси 1.000 километри и забрзување од 0 до 96 km/h за 1,9 секунди. Само неколку дена по ова следеше реакција од Rimac. Јенс Свердуп дилер на Rimac за Северна и Јужна Америка, потврди дека компанијата неколку години развива електричен кабриолет, кој ќе дебитира следната година.
Ако се следи рецептот на Concept_One, идниот Roadster исто така ќе биде моќен и многу динамичен. Concept_One има моќ од 1.224 коњски сили и 2548 Nm максимален вртежен момент. Неговото забрзување од 0 до 96 km/h е 2,5 секунди, а максималната брзина е 354 km/h. Сепак, хрватскиот супер-супер автомобил е скромен во автономијата, само над 320 km со едно полнење.
Заедно со новиот модел Rimac планира да отвори и пет нови претставништва во САД во 2018 година, тоа е дел од програмата за развој на компанијата, овозможена по последната инвестиција од 33 милиони долари и доаѓа од најголемиот производител на акумулатори Camel Group во Азија.