Škoda ги покажа освежените Kamiq и Scala

Четири години по нивната премиера, Škoda подготви фејслифт за своите модели – компактниот хечбек Scala и кросоверот Kamiq, носејќи мали подобрувања кога станува збор за стајлингот, технологијата, безбедноста, одржливоста и ефикасноста.

Однадвор, Scala и Kamiq се веднаш препознатливи бидејќи дизајнерите се одлучија за еволутивен пристап. Промените се фокусирани на новите лица, вклучително и редизајнираните фарови кои се опционално достапни со Matrix-LED технологија и ревидирани предни решетки и браници. Кај освежената Scala, фаровите имаат кристални модули, додека кај Kamiq поделените фарови се потенки.

Профилите се пренесени, но моделите добиваат нови дизајни за алуминиумските тркала со димензии до 18 инчи, додека задните краеви се ажурирани со нова LED графика за задните светла и редизајнираните браници. Понатаму, Monte Carlo верзиите со поспортски изглед се одликуваат со високо-сјајните црни акценти околу каросеријата, затемнетите стакла, стандардните LED диоди и опционалните 18-инчни алуминиумски тркала Ursa. Тие се комбинирани со инсерти од вештачки карбон, црвени детали, спортски седишта, амбиентално осветлување и Monte Carlo графика во кабината.

Ентериер

Кога веќе станува збор за ентериерот, распоредот останува непроменет, но е исполнет со повеќе технологија и одржливост. Осум инчниот дигитален инструмент кластер и 8,25-инчниот екран на допир се дел од стандардната опрема, додека моделите со повисоки спецификации добиваат поголем виртуелен кокпит од 10,25 инчи и комбо за инфозабава од 9,2 инчи. Се разбира, карактеристиките Simply Clever на Škoda не изостануваат.

Чешкиот производител на автомобили додаде и „зголемен дел од рециклирани и природни материјали“ во внатрешноста и надворешноста, подобрувајќи ги акредитивите за одржливост на Scala и Kamiq. Безбедноста е исто така надградена со до 9 воздушни перничиња и проширен пакет достапни системи. Новата структура на нивоата за опременост вклучува три нивоа на опременост (Essence, Selection и Monte Carlo) и 6 внатрешни конфигурации, плус разновидни пакети опционална опрема.

Погонски единици

Двата модели се засноваат на продолжената верзија на архитектурата MQB-A0. Линијата на погонски агрегати во голема мера е пренесена од асортиманот на претходните верзии, со тоа што сега се користат верзиите evo2 на бензинските мотори TSI. Нема хибридни или дизелски опции додека варијантите G-Tec со CNG гориво не се споменати.

Почетниот 1,0-литарски TSI бензинец со три цилиндри произведува 95 КС и е исклучиво поврзан со пет-степен мануелен менувач. Помоќниот 1.0 TSI произведува 115 КС и нуди избор помеѓу 6-степен мануелен и 7-степен DSG. Конечно, водечкиот 1,5-литарски TSI четирицилиндарец произведува 150 КС и се одликува со технологија за деактивирање на цилиндрите ACT, а исто така е достапен со рачен или автоматски менувач. Независно од комбинацијата на моторот и менувачот, сите варијанти на Scala и Kamiq се со погон на предните тркала.

Škoda нуди три различни поставки на шасијата за секој модел, приспособувајќи ги на потребите на нивните сопственици. На стандардната поставка се придружува суспензијата „rough road“ со дополнителни 15 милиметри растојание од подлогата и опционалната „Sport Chassis Control“ која е пониска за 15 мм кај Scala и 10 мм пониска кај Kamiq.

Од 2019 година, Škoda продаде 229.400 единици од Scala и 351.200 примероци од Kamiq, и се надева дека фејслифтираните модели ќе продолжат по истиот пат. Производителот на автомобили не објави конкретни детали за цените и лансирањето на европскиот пазар на двата модели што треба да се очекува наскоро.