Škoda и ABT подготвија специјална Scala Edition S

Кога Škoda го претстави Vision RS концептот во октомври 2018 година на Салонот во Париз, се претпоставуваше дека Scala ќе добие и хот хеч верзија. Концептот кој беше претставен имаше потентен хибриден погон со 1,5-литарски TSI и електромотор со вкупна моќност од 241 КС. Сепак, се уште нема назнака за Scala RS, но затоа сега пристигнува Škoda Scala Edition S, кој не е полнокрвен RS дериватив, но е помоќен и поспортски од стандардниот хечбек.

Scala Edition S е новиот специјален модел на Škoda, кој е создаден во соработка со тјунерот ABT Sportsline и ќе биде првично ограничен на само 500 примероци. Моделите се базирани на Monte Carlo нивото на опременост, со што се добива поголема моќност и поспортски дизајн на надворешноста и внатрешноста.

Овој модел на Škoda се напојува со 1,5-литарскиот TSI бензински мотор кој е унапреден да развива 190 КС и 290 Nm максимален вртежен момент. Тоа е за 40 КС и 40 Nm повеќе во однос на стандардната варијанта, а пристигнува во комбинација со шестстепен мануелен менувач.

Спортски екстериер и ентериер

Škoda Scala Edition S се одликува со спортски систем на потпирање кој го спушта нивото на возење за 15 милиметри, заедно со унапредениот екстериер и додатоци од типот на нов преден браник, покривен спојлер и заден дифузер. Моделот ќе биде достапен во Velvet Red, Black Magic Pearl и Steal Gray, а е поставен на 18-инчните ER-C18 тркала на ABТ и се одликува со Monte Carlo црни дизајнерски елементи на решетката, капаците од ретровизорите и праговите, затемнети задни стакла и LED предни и задни светла со динамични индикатори за насока.

Во внатрешноста, оваа ограничена едиција на хечбекот поседува предни спортски седишта обложени со црна ткаенина, мултифункционален спортски управувач, педали од нерѓосувачки челик и карбонски трим. Во стандардната опрема исто така влегува и Bolero инфозабавен систем, Bluetooth и Care Connect кој овозможува далечински пристап до возилото и други услуги за асистенција.

Новата Škoda Scala Edition S ќе пристигне следната недела со почетна цена од 33.790 евра.