Smart го претстави новиот #3 кросовер

Smart мина низ темелна реорганизација и реосмислување, а сега компанијата официјално го претстави својот втор автомобил на овогодинешниот саем за автомобили во Шангај. Наречен #3, тој е целосно електричен кросовер дизајниран од Mercedes и изграден околу платформата на новиот косопственик на Smart, Geely.

Новиот Smart #3 е долг 4.400 милиметри, широк 1.800 мм и висок 1.600 мм. Исто така, има меѓуоскино растојание од 2.785 милиметри што е за 35 мм подолго од #1 со кого ја споделува истата платформа Sustainable Experience Architecture и подвозје.

Smart не ја откри моторната постава за #3, но ако опциите точно се совпаѓаат со оние во #1, најосновната верзија на новиот автомобил ќе доаѓа со еден електричен мотор од 272 КС што ќе ги движи задните тркала. На другиот крај од спектарот на цени и перформанси, врвниот модел на Brabus треба да додаде мотор со 156 КС поставен напред, со што ќе има комбинирана моќност од 428 КС.

Единствената фотографија од ентериерот покажува дека кабината на #3 е речиси идентична со онаа на неговиот помал брат и има висока централна конзола што се протега до основата на пловечкиот екран на допир со големина од 12,8 инчи, додека вториот дигитален дисплеј зад управувачот со три краци е наменет за инструментите. Се чини дека единствената голема разлика помеѓу контролните табли на двата автомобили е дизајнот на централните отвори за воздух: три кружни за #3 и две тесни правоаголни единици за #1.

Smart вели дека #3 ќе го има своето европско деби на автосалонот во Франкфурт во септември оваа година и ќе биде пуштен во продажба во регионот на почетокот на 2024 година.