Тест Ford Kuga Active X: Обновена основа за нова иднина

Моделот Kuga е сериозно етаблиран преставник во СУВ сегментот како сестран семеен пакет што нуди разумна количина на простор и изненадувачки добар ангажман зад управувачот за возило од овој тип. Со серијата ажурирања компанијата му дава многу поостар изглед кој е пропратен со неколку нови нивоа на опременост, се со цел да се одржи конкурентен во класата каде нови ривали се појавуваат речиси секојдневно. Како дополнување на добро познатата  бензинската опција се и двете хибридни погонски единици кои ветуваат ниски трошоци на експлатација.

Зрела естетика

Времето не мирува, а тоа добро го знаат и во Ford. Од таа причина Kuga доби низа стилски освежувања кои треба да ја одржат како релевантен избор и понатаму. Ажурирањето базирано на третата генерација се одликува со неколку нови надворешни елементи со цел да се зајакне веќе воспоставениот модерен и спортски имиџ.

Најголемите промени се изведени на предниот дел. Прво што паѓа во очи е решетката за довод на свеж воздух до моторот која поседува далеку поатрактивен облик и наново дизајнираниот браник со големи отвори во чии крајни точки се вметнати светлата за магла. Тука се и целосно променетите светлосни групи кои се поврзани со светечка „coast to coast“ лента  која се протега преку горниот дел давајќи пософистициран и подинамичен изглед на предниот дел на возилото.

Силуетата е речиси идентична, единствено се забележува новиот дизајн на леснометалните бандажи со големина од 18 инчи и пластичните заштитни обраби за поголема „теренска“ естетика. Задниот дел е местото каде се направени најмалку промени. Светлосните групи поседуваат сличен облик и графика како кај претходникот што севкупно создава слика за зрел и издржан изглед. Мора да напоменеме дека од ова издание Kuga покрај Titanium и ST верзиите добива ново ниво на опременост наречено Active кое е повисоко поставено од подлогата и е наменето за оние со авантуристички дух… за целосно потполнување на сликата е задолжена ексклузивната зелена нијанса во која беше изведена надворешноста на нашиот тест примерок.

Функционално и комотно

Покрај измените на екстериерот и уредувањето на внатрешноста на Kuga добива доза на освежувања и модификации. Пред се тука се забележува новиот 12,3 инчен екран за наменет за примарните функции, додека „дисплејот“ наменет за мултимедија сега е драстично поголем  со димензии од 13,2 инчи кој ја користи најновата, четврта иретација на компанискиот SYNC оперативен систем. Повеќето секундарни функции се управуваат преку централниот дисплеј, ракувањето е поедноставено и многу логично, а за тоа е заслужно неговото континуирано развивање и надградување.

Забележлива е употребата на материјали со повисок квалитет за обложување на целата внатрешност и седечките површини. Кога веќе го спомнавме седењето, на предниот дел се седи повишено, дури и со поставување на возачкото седиште во најниската позиција. Ова му дава на возачот одлично чувство за контрола над возилото и секако добар поглед на опкружувањето. Компанијата Ford го става акцентот на максимизирање на просторот што е евидентно на задните седишта кои делуваат над просекот ветувајќи високо ниво на комоција и на покрупните сопатници.

Од друга страна, габаритот на багажниот простор изнесува 421 литри во стандардната конфигурација, што е само просечна големина за класата, додека со соборување на задната клупа зафатнината се зголемува на 1.534 литри со што пак е овозможен транспорт на покабасти предмети. Комплетната опременост и модерната технологија покажува дека Kuga е наменета за семејството, бидејќи овој SUV со средна големина поседува се што е во моментов актуелно во индустријата.

Рафинирана ефикасност

Со последните измени е опфатена и моторизацијата кај Kuga, дизелската верзија е испратена во историјата, а понудата се базира на три мотори кои како примарно гориво користат бензин. Изборот стартува со 1.5 литарски турбо бензински модел, следен од самопонечка (FHEV) хибридна опција, додека врвот е резервиран за најсофистицираната приклучна (PHEV) хибридна верзија.

На неколкудневно дружење ни беше одстапена FHEV моделот што комбинира 2,5-литарски бензински мотор со 152 КС и електро мотор со 125 КС што енергијата ја добива од мала 48 волтна батерија со капацитет од 1,1 kWh чија цел е да обезбеди максимална моќност и ефикасност. Вкупната системска моќ изнесува 183 КС и 320 Нм влечна сила кои се испраќаат кон сите четири тркала преку (е-CVT) автоматски менувач. Една од убавините на оваа конфигурација е тоа што никогаш не треба да барате полнач или да се соочите со вознемиреност во поглед на електро опсегот.

Системот функционира така што ја враќа енергијата која обично се губи додека возилото се движи или забавува и ја користи за дополнување на батеријата што го напојува електро моторот. Ова ви овозможува да возите на кратки растојанија без да се вклучи бензинскиот мотор. Перформансите се сосема задоволителни, од место на мирување до 100 км/ч стигнува за  респектабилни 8,3 секунди, а максималната брзина е речиси 200 км/ч. Декларираната просечна потрошувачка изнесува 5,8 л/100 км, а ние за време на тестот постигнавме 8,4 л/100 км, сепак сметаме дека просекот може да спушти за барем за 1 литар.

Моделот Kuga како и речиси секој производ на Ford го користи максимумот од својата шасија, што значи дека oва е СУВ модел на кој свијоците на патишта му „легнуваат на прва“, чувството на доверба доаѓа од прецизното управување кое е како составен дел на карактерот. Ако на се се додаде и погонот на сите тркала, како и неколкуте „модови“ на работа со него можете слободно да планирате авантури за кои одредени конкурентски модели не ни помислуваат.

Рестилизираната Kuga се разликува од соперниците по неколку единствени можности, а една од нив е секако и опцијата за погон на сите тркала, што е веќе реткост кај моделите во овој сегмент. Од друга страна пак изгледот прави да биде сеуште атрактивен предлог кој се надополнува со просторот во кабината и инплементираната нова технологија што смело го носи моделот напред во времето.

Цена на тестираниот модел: 54.900 евра

Технички податоци за Ford Kuga Active X 2.5 FHEV AWD

Ford Kuga во Македонија

Повеќе информации во Гранд Ауто на тел. +389 2 307 3103 или на www.ford.mk

Конкуренти:

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС. НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ Е АМПТЕАМ ДООЕЛ.