Тест Ford Kuga ST-Line: SUV со динамични гени

Компанијата Ford направи јасен избор и тргнува во нов правец со третата генерација на Kuga. Претходно таа се обидуваше да кокетира со теренските возила и патнички автомобил. Отсега кога се мисли на Kuga станува збор за изобилство на просторот и висок квалитет во возењето на асфалтна подлога.

Лансиран на пазарот во 2008 година, моделот Kuga беше првиот SUV на марката во Европа кој многу брзо стана популарен кај купувачите што беа во потрага по нешто ново како замена за традиционалните седан и каравански изведби. Од почетокот на производството Ford има продадено повеќе од 1 милион парчиња Kuga на стариот континет што воедно го прави да биде еден од омилените нови семејни автомобили.

Спортски пропорции

Претходните две генерации на Kuga дизајнерски не одскокнуваа во ниту еден елемент, што не е случај со оваа трета генерација. Од компанијата вложија повеќе труд со цел да го вметнат моделот во кругот кој моментално го одсликува изгледот на моделите од гамата. На прв поглед, Kuga еволуира кон нова и поелегантна естетика. Типичните детали за брендот, како што е хексагоналната решетка на ладилникот е секако повторно присутна. Сега овој SUV доаѓа со изглед кој е со далеку поспортски пропорции успешно избегнувајќи ги замките при обликувањето кои често знаат да преставуваат вистински проблем. Ако на сето тоа се додаде и  ST-Line пакетот кој носи изменети преден и заден браник со поагресивен облик и одличната метализирана нијанса на црвена боја се содава стилизиран и уникатен спортски комплет кој привлекува внимание гледано од сите агли.

Комодитет во прв план

Стилот во уредување на внатрешноста на Kuga е многу сличен со другите модели на Ford, но со акцент на висината за максимизирање на просторот, а Kuga во ова издание секако нуди многу простор! Напред се забележува високата положба на седење, дури и со поставување на седиштето во најниско. Ова му дава на возачот чувство за контрола над автомобилот и секако добар поглед на сообраќајот(можеби не и најудобен за секого). Просторот во задниот дел е натпросечен и може слободно да се сместат три лица. Од друга страна пак, габаритот на багажниот простор изнесува 435 литри во стандардната конфигурација, што е просечна големина за класата, додека со соборување на задната клупа зафатнината се зголемува на 1.534 литри со што пак е овозможен транспорт на покабасти предмети.

Се на свое место

Опремата е модерна и комплетна, но не прогресивна. Ова исто така покажува дека Kuga е наменета за семејството, а не за љубителите на новите и сеуште недокажани технологии кои сакаат да ги импресионираат своите пријатели. Од друга страна тоа не значи дека Kuga е едноставна, бидејќи овој SUV со средна големина поседува речиси сè што е во моментов актуелно на таа тема. Повеќето секундарни функции се управуваат преку централниот дисплеј, додека голем плус доделуваме на одвоениот системот за контрола на климата кој има свои физички команди. Системот за аудио, комуникација и навигација на Ford наречен „Sync“ постојано се развива и надградува, затоа има сè повеќе функции, додека работењето станува поедноставно и пологично. Ако сепак преферирате изворот на вашата забава во возењето да доаѓа од сопствениот паметен телефон можете тоа да да го направите преку поврзувањата со Apple CarPlay или Android Auto.

Нескриено задоволство

Во конфигурацијата ST-Line моделот Kuga што е погонуван од „EcoBoost“ агрегат секогаш има погон на предните тркала. Бензинскиот мотор од 1,5 литри во тест автомобилот е изведен од исклучително успешниот трицилиндерски 1,0 литарски двигател кој Ford го користи во компактните модели со години. Основниот дизајн е изменет така што зафатнината сега изнесува 1.497 кубни сантиметри и се користи најчесто за напојување на поголемите модели на марката. Во сите случаи оваа работна единица е неверојатно силна и се одликува со исклучително мазен работен ритам. Истовремено, изворот на енергија ја врши својата работа толку тивко што постои ризик од незабележано забрзување, за што секако се задолжени 150 КС и влечната сила од 240 Nm која е достапна од ниски 1.600 врт/мин.

Во целиот процес активна улога игра и шестепениот мануелен менувач чии главни особини се прецизниот трансфер, брзото и лесно работење. Затоа за забрзување до 100 км/ч се потребни нешто помалку од 10 секунди, а во полн набој може да стигне до речиси максимални 200 км/ч. Постигнувањата позитивно се одлсикуваат и на потрошувачката, за време на неколкудневното дружење во просек ни беа потребни помалку од 8 литри на секои 100 изминати километри, податок што ја прави Kuga еден од поекономичните (со турбо) преставници во класата.

На пат, Kuga го користи максимумот од својата шасија, oва е SUV модел со јасно изразен динамичен карактер. На кривулестите патишта директното и прецизно управување создава максимално чувство на доверба. Присутна е минимална тенденција на намалување поради повисокото тежиште на автомобилот, но не како кај одредени конкурентски модели.

Со доаѓањето на третата генерација на Kuga, компанијата Ford повеќе не сака овој модел да го прествува како авантуристичко возило за сите терени. Сепак, новата верзија ја користи истата висока градба на каросеријата за да обезбеди максимален простор и функционалност во кабината, но бидејќи Kuga повеќе не мора да функционира и на теренски услови, туку на асфалтни патишта, Ford успеа целосно да се фокусира на второто, а тоа оди во корист на возните карактеристики и динамиката кои нескриено ја покажува во секоја прилика.

Цена на тестираниот модел: 35.800 евра

Технички спецификации за Ford Kuga ST-Line M6 1.5 Ecoboost

Ford Kuga во Македонија

Повеќе информации во Мида Гранд Моторс на тел. (02) 30 73 103 или на www.ford.mk

Конкуренти

СИТЕ ПРАВА ЗАДРЖАНИ-НИТУ ЕДЕН ДЕЛ, ТЕКСТ ИЛИ ФОТОГРАФИЈА НЕ СМЕЕ ДА СЕ РЕПРОДУЦИРА ИЛИ ДИСТРИБУИРА НА БИЛО КОЈ НАЧИН И НА БИЛО КОЈ ЈАЗИК БЕЗ ПРЕТХОДНА СОГЛАСНОСТ ОД РЕДАКЦИЈАТА НА АВТО ПЛУС НОСИТЕЛ НА АВТОРСКИТЕ ПРАВА ВРЗ ТЕКСТОТ И ФОТОГРАФИИТЕ.