Викенд тарифа: Драг трка меѓу BMW M 1000 RR, Porsche 911 и F1 болид
Ни пристигна нов викенд, а тоа значи и нова возбудлива драг трка, овојпат мошне интересна со F1 болид, BMW M 1000 RR мотоцикл и Porsche 911 Turbo S
Иако можеби делува како нешто нереално, сепак екипата на Carwow ни приредува една мошне интересна драг трка во која силите ќе ги одмерат F1 болид, моќен спортски автомобил и неверојатно способен мотоцикл. На мегдан се најдоа BMW M 1000 RR против Red Bull Formula 1 болидот од 2011 година и Porsche 911 Turbo S.
BMW M 1000 RR е претставен во 2021 година и е унапредување на S 1000 RR „супербајкот“ со дополнителна моќност, поголем вртежен момент, намалена тежина, подобри сопирачки и неколку карбонски елементи. Со своите 191 килограми, моќниот BMW мотоцикл достигнува 112 Nm и испорачува 215 КС.
Крај него е Porsche 911 Turbo S од 2021 година. Со својот 3,8-литарски битурбо шестцилиндричен мотор испорачува 659 КС и 599 Nm максимален вртежен момент. Од друга страна, Porsche 911 Turbo S со своите 1.649 килограми има многу повеќе тежина за носење, па тука предност секако има BMW M 1000 RR.
На крајот, тука е и шампионскиот RB7 тркачки болид на Red Bull од 2011 година кој користи технологија стара една деценија. Опремен со 2,4-литарски природно аспириран V8 мотор кој испорачува 750 КС. Со само 650 килограми тежина, болидот има најдобар сооднос на тежина и моќност.
Како изгледа трката меѓу F1 болид, BMW M 1000 RR и Porsche 911 Turbo S, погледнете во прилог.
