Porsche 911 GT3 RS против електрична „Буба“

Volkswagen Type 1, или народски позната како „Буба“, е култен автомобил на германскиот производител, а воедно е и своевиден „роднина“ на Porsche 356, бидејќи двата модели имаат врска со семејството Порше, како и тоа што двата модели имаат воздушно ладен мотор поставен на задната страна. Така, оваа трка помеѓу класичниот Volkswagen и Porsche 911 GT3 RS може да се смета како своевидна трка на „дедо и внук“. Но, „дедото“ во овој случај има еден сокриен адут – електричен погон позајмен од Tesla кој ги напојува задните тркала.

Оваа електрифицирана „Буба“ има 450 КС и 675 Nm вртежен момент, додека карбонските панели на каросеријата ја намалуваат тежината на севкупно 1.050 килограми. Од друга страна, 911 GT3 RS има природно аспириран 4,0-литарски шестцилиндричен мотор кој испорачува 520 КС и 470 Nm максимален вртежен момент кои се испорачуваат до тркалата преку седумстепен автоматски менувач со двојна спојка.