Во Европа сите нови возила ќе имаат ограничувачи на брзина

Европската унија донесе одлука според која сите нови автомобили кои ќе се продадат на територијата на Европа и кои ќе бидат претставени по 2022 година ќе мораат да бидат опремени со ограничувачи на брзината. Иако ова не е новина, бидејќи одлуката беше донесена во 2019 година, на истата вреди да и се посвети внимание, бидејќи стапува на сила од следната година. И тука не станува збор само за ограничување на брзините на автопатите, или улиците крај училиштата, туку и на регионални и магистрални патишта кои немаат голема фрекфенција на автомобили.

Рори Рејд од британски Autotrader е еден од ретките кои активно зборува за сето ова, а сега објави и ново видео во кое се покриваат сите промени кои ќе пристигнат, обидувајќи се да разјасни некои збунувачки факти околу тоа како технологијата ќе функционира и кои автомобили во Европа ќе бидат зафатени со оваа новина.

Рејд објаснува дека автомобилите кои веќе биле хомологирани пред 6 јули 2022 година имаат рок до 2024 година да ја прифатат новата технологија, која ќе користи комбинација на GPS податоци и камери за препознавање на сообраќајните знаци, со цел да ја корегира брзината на патиштата.

И покрај тоа што крајниот рок е за само 12 месеци, дел од деталите се уште се нејасни, но се чини дека автомобилите ќе ги приморуваат возачите да се придржуваат до ограничувањата на патот со предупредувачки светлечки и звучни сигнали, па дури автоматско враќање на педалата за гас, наместо да го направи надминувањето на брзината целосно невозможно со запирање и забавување на возилото.