ЕВ батериите може да траат и до 40% подолго од очекуваното
Новото истражување од Stanford Battery Center покажува дека ЕВ батериите на можат да траат подолго од очекуваното
Деградацијата на батериите е сериозен проблем што може значително да ја намали автономијата на постарите електрични возила или да доведе до скапа замена на батеријата. Сепак, ново истражување од научниците на SLAC-Stanford Battery Center открива дека батериите кај електричните возила би можеле да траат многу подолго отколку што претходно се сметаше.
Типичните пресметки за животниот век на батериите често се засноваат на постојани циклуси на полнење и празнење, што не ја одразува реалната употреба на електричните возила. Во реалноста, овие возила се користат за сè, од кратки градски патувања до долги автопатни релации, со различни стилови на возење и полнење.
Револуционерно тестирање
Истражувачите создале четири различни профили на празнење, базирани на реални податоци за возење, и тестирале 92 комерцијални литиум-јонски батерии повеќе од две години. Резултатите покажале дека пореалистичните профили водат до значително подолг животен век на батериите.
Меѓу изненадувањата е и тоа што краткото и нагло забрзување може да предизвика помала деградација на батериите, што е спротивно од очекувањата. Дополнително, регенеративното кочење и „одморот“ на батериите исто така помагаат тие да траат подолго.
Што е поважно: времето или циклусите?
Кај батериите, циклусите на полнење и празнење се клучни за возила што се постојано во употреба, како такси возила, автобуси и доставни комбиња. За просечните потрошувачи, времето е најголемиот непријател, бидејќи батериите стареат и кога возилото не се користи активно.
Што значи ова за иднината?
Истражувањето предлага производителите на автомобили да го ажурираат софтверот за управување со батерии за да ги искористат овие нови сознанија и да го максимизираат животниот век на батериите во реални услови. Ова би можело значително да ја подобри издржливоста на електричните возила и да ја намали потребата за скапи замени на батерии.
Идните подобрувања базирани на овие откритија би можеле да значат подостапни и поодржливи електрични возила за сите.
