Кина ја изигра ЕУ, производителите најдоа начин да ги избегнат царините
BYD и MG масовно зголемуваат продажба на плаг-ин хибриди во Европа за да ги избегнат високите царини на ЕУ за електрични возила
Кинеските автомобилски брендови пронајдоа начин како да ја заобиколат европската царинска политика која од октомври 2024 година воведе високи тарифи за увоз на електрични возила (EV) од Кина. Наместо да се соочуваат со дополнителни трошоци, тие сè повеќе се насочуваат кон плаг-ин хибридни возила (PHEV), кои се покриени со многу пониски царини.
BYD и MG со рекордни бројки
Според извештај на Dataforce, BYD веќе регистрирал над 20.000 PHEV возила во ЕУ во првата половина на 2025 година, што е тројно повеќе од целиот увоз во 2024. Слична стратегија применува и MG, кој преку својот матичен концерн SAIC бележи нагло зголемување на продажбата на хибридни модели како MG HS, MG ZS и MG 3, додека продажбата на EV модели паднала за 60 проценти.
Луксузниот бренд Lynk & Co, исто така, ги зголемува своите PHEV регистрации во Европа, користејќи ја истата царинска „сива зона“.
Царини што прават огромна разлика
Причината е едноставна – EV моделите увезени од Кина се казнети со високи царини. Во Германија, на пример, за секое возило на BYD се плаќа 27% вкупна давачка, што кај моделот Atto 3 значи околу 10.000 евра дополнителен трошок. За споредба, плаг-ин хибридот BYD Seal U подлежи само на 10% царина, што изнесува околу 4.000 евра на неговата почетна цена.
Ситуацијата е уште понеповолна за SAIC (MG), кој плаќа рекордни 45,3% царини за увоз на електрични возила. Како резултат, компанијата ја намалила EV продажбата, но агресивно ја зголеми понудата на хибриди.
Европската комисија свесна за „дупката“
Иако Европската комисија е свесна за оваа стратегија на кинеските производители, засега не презема конкретни мерки. Според Beatrix Keim од германскиот Центар за автомобилски истражувања, „само беше прашање на време пред кинеските брендови да ја сменат својата стратегија за да ја зголемат профитабилноста во Европа.“
Брисел, наместо дополнителни ограничувања, моментално се надева дека со дијалог ќе успее да најде решение со брзорастечките кинески производители.
