Volkswagen го претстави новиот T-Roc

Втората генерација на Volkswagen T-Roc пристигна осум години по премиерата на оригиналниот модел, носејќи значајни промени во дизајнот, технологијата и погонот. Популарниот кросовер сега е поголем, има целосно редизајнирана кабина и првпат во историјата на брендот добива целосен хибриден погон.

Модерен дизајн и подобрена аеродинамика

Новиот T-Roc задржува препознатлива форма, но со подинамични пропорции и детали инспирирани од електричните модели на VW. Предниот дел ја губи класичната маска и добива светлечка LED лента со осветлено лого, додека спортските отвори за воздух и суптилен сребрен заштитен елемент додаваат робусен карактер.

Профилот ја задржува „hockey-stick“ линијата во C-столбот, но со почисти површини и посилно изразени крила. Новите LED задни светла и спортската линија на покривот внесуваат купе изглед. Аеродинамиката е подобрена за 10 проценти, со коефициент на отпор од само 0,29 cd.

Повеќе простор и нови димензии

Моделот е долг 4.373 mm, што е за 122 mm повеќе од претходникот, а меѓуоскиното растојание е зголемено за 28 mm. Овие промени обезбедуваат повеќе простор во кабината и поголем багажник со капацитет од 465 литри – 20 литри повеќе од порано.

T-Roc ќе се нуди во четири нивоа на опрема – Base, Life, Style и спортскиот R-Line, кој носи поголеми отвори за воздух, заден дифузер и можност за Black Style пакет со затемнети детали.

Кабина со премиум чувство

Volkswagen вели дека внатрешноста на новиот T-Roc е изедначена со повисоките модели Tiguan и Tayron. Тврдите пластики се заменети со текстил и мек материјал, има ново амбиентално осветлување и околу 20% од пластиката е од рециклирани материјали.

Централниот дисплеј е достапен во 10,4 или 12,9 инчи, а инструментите се дигитални со 10-инчен екран. Дополнително, достапен е head-up дисплеј и мултифункционално контролно копче кое управува со звук, режими на возење и амбиентални „атмосфери“.

Опции вклучуваат ергоActive седишта со масажа, озвучување Harman Kardon и нови системи за асистенција – Travel Assist со автоматски промени на лента, Exit Warning и Park Assist Pro со целосно автоматско паркирање.

Погонска понуда: бензинци, mild-hybrid и прв full-hybrid

Новиот T-Roc се базира на MQB Evo платформата и нуди широк избор на мотори. Најголемата новина е воведувањето на целосен хибрид – првпат за VW. Овој систем комбинира 1.5 TSI evo2 со електричен модул и литиум-јонска батерија, достапен во две изведби со 136 или 170 коњски сили и 306 Nm вртежен момент.

Покрај тоа, се нудат две mild-hybrid изведби на 1.5 eTSI моторот – со 116 или 150 КС – секогаш во комбинација со DSG менувач и 48V систем. За љубителите на традиционалните погони ќе биде достапен и 2.0 TSI мотор, со опција за 4Motion погон на сите тркала.

Продажба и позиционирање

Предпродажбата во Европа започнува кон крајот на август, а првите испораки се очекуваат во ноември. Цените ќе бидат објавени дополнително.

Од своето лансирање во 2017 година, Volkswagen T-Roc е продаден во повеќе од 2 милиони примероци, а само во 2023 година беа испорачани 292.000 единици – што го прави втор најуспешен SUV на брендот по Tiguan.